Сорох сиринэн ардахтаах, киин улуустарга түүн -2° кыраадыс, тоҥоруу

Саха сиринээҕи Гидрометеорология киинин синоптиктарын билгэлэринэн, бүгүн, бэс ыйын 13 күнүгэр, өрөспүүбүлүкэ хотугулуу-арҕаа өттүгэр, Өлүөнэ алын тардыытынан, күнүһүн Дьааҥыга кыралаан, сорох сирдэринэн орто күүстээх ардах түһэрэ күүтүллэр. Оттон атын улуустарга сөҥүүтэ суох буолуоҕа.

Тыал орто күүстээх, сорох сиринэн сөкүүндэҕэ 9-14 м. диэри күүһүрүө, Арктика кытылыгар сөкүүндэҕэ 18-23 м. диэри түһэр тыаллаах буолуоҕа.

Салгын температурата түүн +1+6° сылаас, халлаан халыннаҕына намыһах сирдэринэн (Горнайга, Алдаҥҥа, Хаҥаласка, Өлүөхүмэҕэ, киин улуустар илиҥҥи өттүлэригэр) 0, -2° диэри тымныйыаҕа, тоҥоруу түһүөҕэ. Хотугулуу-илиҥҥи улуустарга -3,+2°, хотугулуу-арҕаа +7+12° сылаас буолара сабаҕаланар.

Күнүһүн салгын +18+23° кыраадыска диэри сылыйыаҕа, соҕуруулуу-арҕаа улуустарга +24+29°, хотугулуу-илиҥҥи өттүгэр +14+19° сылаас буолуоҕа.

Дьокуускай куоракка түүн +3+5°, күнүһүн +21+23° сылаас буолар. Түүнүн сүнньүнэн сөҥүүтэ суох, күн аҥарын кэннэ кыра ардах түһүөҕэ. Соҕуруулуу-арҕааттан түүнүн сөкүүндэҕэ 2-7 м. күүстээх тыалллаах, күнүһүн тыал тэтимэ сөкүүндэҕэ 7-12 м. диэри күүһүрүөҕэ.