Сунтаар улууһугар ойуурга муммут эр киһини буллулар

Бэҕэһээ киэһэ Сунтаар улууһун Аллыҥа сэлиэнньэтигэр сүппүт киһини көрдүүр-быыһыыр үлэ этэҥҥэ түмүктэннэ. 1965 сыллаах төрүөх Аллыҥа олохтооҕо тыыннаах уонна доруобай көһүннэ.

Саха сирин Быыһыыр сулууспатын Сунтаардааҕы быыһыыр-көрдүүр пуоһун начаалынньыга Артем Яковлев иһитиннэрбитинэн, эр киһи от ыйын 21 күнүгэр, үс дьахтары кытта сир астыы барбыт. Күнүс кини соҕотоҕун хаалан салгыы хомуйарга быһаарыммыт, онтон аргыстара бөһүөлэккэ төннүбүттэр. Дьахталлар кэлин эр киһи кэргэнигэр төлөпүөннээбиттэрэ, дьиэтигэр кэлэ илик эбит. Ити киэһэ эр киһи сүппүтүн туһунан иһитиннэрии улуус ЕДДС-гар биллэрбиттэр.

Көрдүүр үлэ тута ол киэһэттэн саҕаламмыт. Сунтаардааҕы быыһыыр-көрдүүр пуоһун быыһааччыта Марк Потапов уонна баҕа өттүнэн кэлбит дьон «Сокол» тиэхиньикэнэн түүнү быһа сири-уоту чинчийбиттэр.

Бэҕэһээ сарсыарда эрдэттэн көрдүүр үлэҕэ сүрүн күүстэр кыттыспыттар. Сунтаардааҕы быыһыыр-көрдүүр пуост быыһааччылара сири-уоту араартаан баран, чинчийэргэ үс бөлөҕүнэн тарҕаспыттар. Көрдүүр сирдэрин эргийэ хаампыттар, оттон сиринэн «Сокол» тиэхиньикэни туһанан кэрийбиттэр. Тойбохой сэлиэнньэтиттэн «Сокол» тиэхиньикэлээх эбии көмө бөлөҕө кэлбит. Бэйэлэрин баҕаларынан көмөҕө кэлбит дьон быыһааччылар оҥорбут былааннарынан көрдүүр үлэни салҕаабыттар. Кинилэргэ күнүс 15:40 чааска сүппүт киһи бэйэтэ утары тахсан кэлбит. Кинини Аллыҥа уонна Тойбохой сэлиэнньэлэрин икки ардыларыгар, Аллыҥаттан биэрэстэлээх сиргэ булбуттар.

Эр киһи быыһааччыларга кэпсээбитинэн, кини биир түгэҥҥэ ханна сылдьарын өйдөөбөккө муммут. Түүн мас анныгар хоммут.

Сүппүт киһини көрдүүр үлэҕэ уопсайа 34 киһи уонна үс тиэхиньикэ кыттыбыт. 61 саастаах эр киһи олоҕор куттал суоһаабат.