Суол быһылаанын буруйдааҕа бириистэптэр күүстэринэн хоромньуну төлөөтө

РФ Суут бириистэптэрин федеральнай сулууспатын Саха сиринээҕи управлениетын Ньурба оройуонун салаатыгар суол быһылаанын түмүгэр тахсыбыт хоромньуну ирдээһин туһунан дьыала түмүктэннэ.

Ньурба оройуонун суута иэстээх киһи РФ Административнай кэһиилэр тустарынан кодексатын 12.15 ыстатыйатын 3 чааһын кэһэн утары суолга тахсыбытын, онтон сылтаан быһылаан тахсыбытын уонна ирдэһээччи массыыната алдьаммытын быһаарбыт. Онон сибээстээн суут буруйдаахтан хоромньуну толуйууну, өрөмүөн үлэтин сыанабылын оҥоһуу ороскуоттарын, ону тэҥэ судаарыстыба нолуогун — уопсайа 1 мөлүйүөнтэн тахса сууманы төлөттөрөргө уураахтаабыта.

Дьыала суут бириистэптэригэр киирбитэ. Күһэйэр дьаһаллар чэрчилэринэн харчытын арестааһын уонна ирдээһин, дойду таһыгар тахсарын быстах кэмҥэ хааччахтааһын, иэстээх киһи сирин уонна кыбартыыратын регистрациялыыры бобуу, ону тэҥэ толоруу хомуурун ирдээһин туһунан уураахтар тахсыбыттар.

Ылыныллыбыт дьаһаллар түмүктэригэр иэстээх киһи иэһин быһа туттарыыта суох төлөөбүт уонна иэһин сууматын толору саппыт, диэн Суут бириистэптэрин федеральнай сулууспатын Саха сиринээҕи управлениетын пресс-сулууспата суруйар.