Суордаахха быыһааччылар үлэлииллэр

Дьааҥы улууһун Суордаах сэлиэнньэтигэр саахалы туоратар, чөлүгэр түһэрэр үлэлэр ыытыллаллар. Ардах халаанын содулун туоратыыга быыһааччылар кытталлар. Бу туһунан Быыһыыр сулууспа пресс-сулууспата иһитиннэрэр.

Бөлөх ыстаарсайа Аркадий Макитов 18 аадырыска үлэ ыытыллыбытын этэр. Олорор дьиэлэртэн уонна тиэргэннэртэн ууну обортордулар, ону тэҥэ халаантан хаалбыт бөҕү-сыыһы ыраастаатылар уонна салгылатаары маллары таһырдьа таһаардылар.

Быыһааччылар бөлөхтөрө олохтоохтортон киирбит көрдөһүүлэри барытын  толорон бүтүөхтэригэр диэри үлэлииллэр.

Суордаах сэлиэнньэтигэр Дулҕалаах үрэххэ уу таһыма 698 см тэҥнэһэр. Кэнники 12 чаас устата 55 см намтаабыт. Муҥутуур кутталлаах  бэлиэтэ — 780 см.