Суоттулар тэрээһиҥҥэ түмүстүлэр

Арассыыйаҕа Норуоттар сомоҕолоһууларын, Саха сиригэр Култуура сылларын чэрчитинэн Суотту бибилэтиэкэтигэр Арассыыйаҕа Пушкин төрөөбүт күнүнэн «Мэҥэ тыл күүһүнэн мэҥэ таас туруордум» литература күнэ буолан ааста.

«Бу ууллан сүтүөхтүү уйаҕас кэрэттэн кэрэни билбиппин…» улуу поэт олоҕуттан, айымньыларыттан билиһиннэриини дьон-сэргэ сэҥээрэн иһиттэ. Пушкины сахалыы саҥардыбыт саха суруйааччыларын, бэйиэттэрин тылбаастарын дорҕоонноохтук ааҕыылар, «Тылбааска холонуу», «Пушкин тула» бириистээх викториналар ыытылыннылар.

Г.Г.Мигалкин* «Зимняя дорога» романс ыллаан, М.А. Спиридонова Пушкин А.Кернҥа анаабыт хоһоонун Н.В. Михалева-Сайа тылбааһын ааҕан көрөөччүлэр кэрэхсэбиллэрин ыллылар. Олохтоох ааптар, СӨ суруйааччыларын сойууһун чилиэнэ И.П.Попов — Оҕуруоттаах айар үлэтин сырдатта.

Викторинаҕа бастыҥнарынан М.И.Сокольникова, Г.Г.Мигалкин*, В.В.Патрасова, Е.И.Свинобоева, М.А.Копырина буоллулар.
Бибилэтиэкэҕэ үгэс быһыытынан нуучча тылын уонна литературатын сыллата ыытыллар күнүгэр, быйыл Суотту орто оскуолатын иһинэн үлэлиир «Кэскил» лааҕыр оҕолоро уонна иитээччилэрэ кытыннылар.

«Ымыы» аҕам саастаахтар түмсүүлэрэ (сал. Г.Г.Мигалкин*) көхтөөхтүк кытыннылар. Инникитин маннык литература түһүлгэлэрин суруйааччылар үбүлүөйдээх дааталарыгар анаан тэрийэргэ былааннарын билиһиннэрдилэр.

Раиса Черкашина

Екатерина Свинобоева хаартыскаларга түһэриитэ.