Суукка иһигэр 25 тыһ. гектартан тахса иэннээх 15 ойуур баһаара умуруорулунна

Ааспыт сууккаҕа Саха сиригэр уопсайа 25153 га иэннээх 15 ойуур баһаара умуруорулунна.

Таатта, Уус Маайа, Мииринэй, Өлөөн улуустарыгар тахсыбыт умайыылар суох оҥоһулуннулар диэн СӨ Экологияҕа, айылҕаны туһаныыга, ойуур хаһаайыстыбатыгар миниистирин солбуйааччы уонна өрөспүүбүлүкэ кылаабынай лесничэйэ Андрей Коноплев эттэ.

Суукка саҕаланыыта өрөспүүбүлүкэ сиригэр-уотугар 56 ойуур баһаара умайа турар. Уопсайа 191 143 га иэннээх тоҕус ойуур баһаарын умуруоруу үлэтэ салҕанар. Ньурба, Мииринэй, Өлөөн, Орто Халыма улуустарыгар баһаары утары үлэ бара турар. Бүгүн 501 киһилээх бөлөх уонна 57 тиэхиньикэ ыытыллыбыт.

«Эйик нэһилиэгин аттыгар баар баһаары чопчу быһаарыахпын баҕарабын. Уматыы түмүктэннэ, билигин кэтээн көрөр үлэ барар. Нэһилиэккэ куттал суоһаабат. Онон кэлэр күннэргэ нэһилиэккэ куттал суох буолуутун хааччыйар үлэни түмүктүөхпүт диэн былаанныыбыт», — диэн Коноплев бэлиэтээтэ.

Ойуур баһаарынан эрэгийиэҥҥэ биллэриллибит ыксаллаах быһыы-майгы Ил Дархан ыйааҕынан от ыйын 10 күнүттэн үлэлии турар. Мииринэй, Өлөөн, Ньурба, Орто Халыма улуустарыгар муниципальнай ыксаллаах быһыы-майгы ойуур баһаардара суох оҥоһуллуохтарыгар диэри үлэлиир.

СӨ Ил Дарханын уонна Бырабыыталыстыбатын пресс-сулууспата.