Сууттаммыт киһини кытаанах эрэсиимнээх холуонньаҕа ыыттылар

Мэҥэ Хаҥалас оройуонун суута олохтоох киһиэхэ усулуобунайдык сууттаммытын көтүрдэ уонна көҥүлүн быһан, кинини кытаанах эрэсиимнээх көннөрөр холуонньаҕа 1 сыл болдьоххо ыытта.

Бу эр киһи РФ ХК 115 ыст. 2 ч. “в” пуунунан буруйдааҕынан билиниллибитэ уонна киниэхэ 2 сыл кэтээн көрөр болдьохтоох усулуобунайдык 1 сыл көҥүлэ быһыллыбыта.

Кэтээн көрүллэр болдьоҕор буруйдаах киһи бэрээдэги уонна накаастабылын усулуобуйатын син-биир кэһэ сылдьыбыта. Онон Мэҥэ Хаҥалас оройуонун суутун уурааҕынан 2025 сыл ыам ыйын 23 күнүгэр кэтээн көрөр болдьох киниэхэ биир ый уһатыллыбыта, ону тэҥэ эбии эбээһинэс сүктэриллибитэ. Ол курдук, кини нарколог-бырааска көрдөрүнэн, наада буолар түгэнигэр арыгыттан эмтэниини ааһарыгар.

Ол эрээри сууттаммыт киһи итинтэн сөптөөх түмүктэри оҥостубатах, киниэхэ суут сүктэрбит эбээһинэһин толорботох. Ол курдук, төһө эмэ арыгыттан эмтэммит эрээри, итирдэр утаҕы иһиинэн үлүһүйбүт, уопсастыбаҕа бэрээдэги кэһэн, административнай эппиэтинэскэ тардыллыбыт.

Холуобунай-толотторор иниспиэксийэ киниэхэ сэрэтэр үлэни хаста эмэ ыыппыт, суругунан усулуобунайдык сууттаныы тохтотуллубутун туһунан сэрэтии ыытыллыбыт. Ол эрээри бу миэрэлэр кинини көнөр суолга туруорбатахтар.

Мэҥэ Хаҥалас оройуонун холуобунай-толорор иниспиэксийэтин филиалын начаалынньыга суукка усулуобунайдык сууттааһыны уонна накаастабылы толоруу туһунан 2024 сыл алтынньы 24 күнүнээҕи Мэҥэ Хаҥалас улууһун 15 №-дээх учаастагын мировой судьуйатын бириигэбэрин тохтотор туһунан туруорсууну киллэрбит.

Бу быһаарыыны кытта сууттаммыт киһи сөбүлэспэтэх, киниэхэ көнөрүгэр бириэмэ биэрэллэригэр көрдөспүт.

Ол эрээри суут холоуобунай-толотторор иниспиэксийэ туруорсуутун өйөөбүт уонна усулуобунайдык ууруллубутун көтүрэн, бу киһини кытаанах эрэсиимнээх көннөрөр холуонньаҕа ыытан, 1 сыл көҥүлүн быһарга уураахтаабыт.

Уураах күүһүгэр киирэ илик.

Саха Өрөспүүбүлүкэтин Сууттарын холбоһуктаа пресс-сулууспата