Суутунан байыаннай дьайыыга өлбүт уолун иһин төлөбүр аҕатыгар тохтотулунна

Саха Өрөспүүбүлүкэтин Үрдүкү Суутун гражданскай дьыалаларга апелляционнай коллегията Мэҥэ Хаҥалас улууһун оройуонун суутун быһаарыытын сокуоннайынан билинэн, уларытыыта суох хаалларда. Бу быһаарыынан байыаннай дьайыыга өлбүт байыаннай сулууспалаах аҕата, өлбүт байыаннайдар дьиэ кэргэттэрин чилиэннэригэр РФ сокуонунан көрүллэр социальнай өйөбүл миэрэлэрин ылар бырааба тохтотулунна. Өлбүт саллаат эбэтэ – сиэнэ сокуоннай сааһын туолуор диэри дьиҥнээҕинэн ииппит уонна көрбүт-харайбыт киһинэн билинилиннэ.

Дьыала матырыйаалларыттан көстөрүнэн, байыаннай сулууспалаах байыаннай дьайыы кэмигэр байыаннай иэһин толоро сылдьан олохтон туораабыт. Кини өлбүтүн кэннэ эбэтин уонна аҕатын икки ардыларыгар страховой төлөбүрдэри, биир кэмнээх босуобуйаны уонна атын социальнай өйөбүл миэрэлэрин ылар быраап иһин мөккүөр тахсыбыт.

Суут быһаарбытынан, төрөппүттэр ыал буолуулара өлбүт байыас икки саастааҕар тохтообут. Аҕата арахсыбыттарын кэннэ уолун кытта туох да сибээскэ тахсыбатах, материальнай көмөнү оҥорботох.Ону таһынан уолугар сыһыаннаан төрөппүт быраабыттан быһыллыбатах, алимен ирдэммэтэх. Уолу дьиҥнээҕинэн эбэтэ ииппит уонна көрбүт-истибит. Итини аахсыбакка, уола өлбүтүн кэннэ аҕата федеральнай уонна эрэгийиэннээҕи төлөбүрдэри социальнай өйөбүл быһыытынан ылар баҕалааҕын биллэрбит.

Дьыала матырыйаалларын үөрэтэн, өрүттэри уонна туоһулары истэн баран, суут эбэтин ирдэбилин толорор туһунан быһаарыыга кэлбит. Суут быһаарыытын сөбүлээбэккэ, уол аҕата суут быһаарыытын көтүрэргэ уонна дьыаланы атын састаапка саҥаттан көрүүгэ ыытарга көрдөспүт. Ол эрээри, апелляционнай коллегия төрүөт булбата, онон суут быһаарыытын уларытыыта суох хаалларда, диэн СӨ Сууттарын холбоһуктаах пресс-сулууспата иһитиннэрэр.