Байыаннай дьайыы бэтэрээннэригэр уонна волонтердарга “СВОя война” испэктээкили көрдөрдүлэр

Олунньу 23 күнүгэр Саха академическай тыйаатырыгар “Аҕа дойду көмүскээччилэрэ: махтал уонна өйөбүл” диэн улахан тэрээһин буолла.

Бырааһынньыкка анаан РФ уонна СӨ норуодунай артыыһа Андрей Борисов “СВОя война” испэктээкилин көрдөрдүлэр. Тэрээһиҥҥэ бойобуой дьайыылар бэтэрээннэрэ, байыаннайдар, кинилэр дьиэ кэргэттэрэ, волонтердар кыттыыны ыллылар.

Испэктээкили волонтердар хамсааһыннарын кыттыылааҕа Александр Седалищев дьиҥнээх сабыытыйаларга олоҕуран суруйбут пьесатынан туруорбуттар. Манна “Хадаар” диэн позвынойдаах Саха сириттэн кэлбит уол Оксана диэн дьахтары кытта тапталлара кэпсэнэр.

Испэктээкили туруорууга байыаннай дьайыы икки бэтэрээнэ кыттыыны ылбыт.

“Ааптар — байыаннай дьайыы волонтера. Кини Донбасска, Луганскайга уонна Запорожьеҕа хаста да сылдьыбыта, онон кини кырдьыга олус суолталаах. Бу испэктээкилинэн биһиги дьоруойдарбытыгар, кыргыһыы хонуутугар охтубут уонна бүгүн кыайыыны чугаһата сылдьар байыастарга, сүгүрүйэбит», — диэтэ режиссер Андрей Борисов.

«Биһиги үөрдүбүт. Испэктээкил биһиги дууһабытын дириҥник долгутта, истиҥ санаатынан сөхтөрдө. Дьиҥнээх түгэннэри көрдүбүт, бииргэ сэриилэспит доҕотторбутун ахтан-санаан аастыбыт. Талааннаах артыыстарга, режиссерга махтанабыт. Маннык испэктээкиллэр наадалар,  дьон буола турар сабыытыйалары билиэхтээх», — диэн РФ Дьоруойа Александр Колесов санаатын үллэһиннэ.

Испэктээкил чэрчитинэн наҕараадалары туттарыы буолла. Ыччаты патриотическай иитиигэ кылааттарын иһин Сэбиэскэй Сойуус Дьоруойа Федор Попов аатынан «Патриот сүрэҕэ» диэн бочуоттаах бэлиэнэн байыаннай дьайыы кыттыылаахтарын Дмитрий Звездовы, Алексей Лыткины уонна бойобуой дьайыы бэтэрээнин Владимир Ноговицыны наҕараадалаатылар. Байыаннай дьайыыга сылдьар саха байыастарын өйүүрүн иһин “Кыайыыга биииргэ!” өрөспүүбүлүкэтээҕи  хамыыһыйа Москватааҕы суһал ыстаабын аатыттан махтал суругу волонтер Светлана Жирковаҕа туттардылар.

Ил Түмэн дьокутаата Александр Подголов Ил Түмэн Бочуоттаах грамоталарын  Бойобуой дьайыылар бэтэрээннэрин ассоциациятын бэрэссэдээтэлэ Николай Гребенниковка, Афганистан уонна анал байыаннай дьайыылар бэтэрээннэрин Арассыыйатааҕы сойууһун регионнааҕы салаатын бэрэссэдээтэлэ Валерий Лютайга  уонна байыаннай дьайыы кыттыылаахтарын ийэлэрэ, эдьиийдэрэ, кэргэнэ Анжелика Талибаеваҕа туттарда.

«Бу ураты күн барыбытын түмтэ. Биһиги байыастарбытыгар саамай үрдүк ытыктабыл бэриллэр. Фроҥҥа кыргыһа сылдьар чугас дьоннорун туһугар күннэтэ долгуйар дьиэ кэргэттэргэ туһунан  махтал», — диэн мустубут дьоҥҥо тоһоҕолоон бэлиэтээтэ СӨ ыччат дьыалаларыгар уонна социальнай коммуникацияларга миниистирэ Пётр Шамаев.

Тыйаатыр  фойетыгар «Саха сирин бойобуой шелкопрядтара» волонтерскай тэрилтэ чилиэннэрэ хаххалыыр сиэккэни оҥоро сылдьаллар. Манна ким баҕарар кыттыан сөп, диэн суруйар Ил Дархан, бырабыыталыстыба пресс-сулууспата.