Сыл саҕаланыаҕыттан мэдиссиинэ 10 саҥа эбийиэгэ үлэҕэ киирбит

2026 сыл  саҥатыттан дойду бэрэсидьиэнэ Владимир Путин көҕүлээбит «Уһун уонна көхтөөх олох» национальнай бырайыагын чэрчитинэн Саха сиригэр уон мэдиссиинэ  эбийиэгэ үлэҕэ киирбит.

«Национальнай бырайыактар өрөспүүбүлүкэ социальнай инфраструктуратын тэтимнээхтик хаҥатар кыаҕы биэрэллэр. Тутуу салаатын сыала-соруга олохтоохторго наадалаах эбийиэктэри хаачыстыбалаахтык уонна кэмигэр тутууну хааччыйыы буолар», — диэн бэлиэтээтэ тутуу миниистирэ Виктор Романов.

Ол курдук, Нам улууһугар Нам нэһилиэгэр мэдиссиинэ куорпуһа, Амма улууһугар 2-с Чакыр, Уус Алдаҥҥа Бэйдиҥэҕэ, Сунтаар Тойбохойугар, Үөһээ Бүлүү Боотулуутугар, Ньурба Чаппандатыгар, Нам Кириэс Кытылыгар, Мэҥэ Хаҥалас Табаҕатыгар, Таатта Томторугар уонна Дьокуускай Мархатыгар мэдиссиинэ саҥа тутуулара арылыннылар.

«Саҥа амбулатория аһыллыбытынан, биһиэхэ билигин үлэлииргэ уонна мэдиссиинискэй көмөнү оҥорорго табыгастаах усулуобуйа баар буолла. Улахан дьону да, оҕолору да көрөбүт, күннэтэ дьон доруобуйатын көрөбүт-истэбит», — диэн бэлиэтээтэ Табаҕатааҕы мэдиссиинискэй амбулатория терапевт бырааһа Уруйдаана Сергучева.

«Национальнай бырайыактар ​​олоххо киирэллэринэн, өрөспүүбүлүкэ мэдиссиинискэй инфраструктуратын киэҥ далааһыннаах саҥардыы салҕанар. Үгүс балыыһалар, бастакы көмө пууннара, амбулаториялар аһылыннылар, ол түмүгэр өрөспүүбүлүкэ олохтоохторо бастыҥ усулуобуйаҕа үрдүк хаачыстыбалаах мэдиссиинискэй көмөнү ылаллар», — диэн бэлиэтээтэ доруобуйа харыстабылын миниистирэ Лена Афанасьева. 2018 сылтан ыла Саха сиригэр 130-тан тахса доруобуйа харыстабылын саҥа эбийиэгэ үлэҕэ киирбит.

Сиһилии: https://www.sakha.gov.ru/news/67889 сигэнэн аах.