Сүрэҕэ уон биирдэ тохтообут киһини быыһаабыттар

Дагестаннааҕы балыыһа быраастара сүрэҕэ уон биирдэ тохтообут ыарыһаҕы быыһаабыттар.

Эр киһи Сүрэх-тымыр киинигэр инфарктаан, олус ыарахан туруктаах киирбит. Ыарыһах сүрэҕэ 11-дэ тохтуу сылдьыбыт, ол эрээри быраастар үрдүк технологиялаах тэрили туһанан, кинини быыһаабыттар.

61 саастаах эр киһи сүрэҕэр хаан сүүрүүтүн чөлүгэр түһэрэр эпэрээссийэни оҥорбуттар, коронарнай тымырдарыгар стент туруорбуттар. Билигин ыарыһах туруга үчүгэй, бэйэтэ хаамар.

Оттон Москваҕа Морозовскай балыыһа быраастара 250 магнитнай саарыгы ыйыстыбыт 2 саастаах кыыһы быыһаатылар.

Хата, төрөппүттэрэ оҕону балыыһаҕа суһаллык аҕалбыттар. Кыыс күүскэ сөтөллөр эбит. Рентгеҥҥэ түһэрэн баран, быраастар олус соһуйбуттар. Магнит саарыктара оҕо куртаҕар мөчөкөлөһөн, сыстыһан хаалбыттар.

Быраастар эпэрээссийэлээбэккэ эрэ, кыыс куртаҕыттан анал эндоскопическай тэрилинэн хостоон таһаарбыттар. Өскөтүн магниттар салгыы барбыттара буоллар, оһоҕос эриллэҕэстэригэр сыстыһан, дьөлүтэ тэһэн, алдьатыахтаах этилэр. Оччотугар оҕо тыыннаах хаалара да уустук буолуохтаах этэ. Быраастар билигин кыыс туруга үчүгэй, сотору балыыһаттан тахсар дииллэр.