«Сүрэххэ чугас»: Москваҕа Татьяна Бурцева бастакы тус быыстапката арылынна

СӨ Бастайааннай бэрэстэбиитэлистибэтигэр биллиилээх суруналыыс уонна саха тэлэбиидэнньэтин ыытааччыта, билигин худуоһунньук Татьяна Бурцева айар үлэтигэр анаммыт быыстапканы үөрүүлээхтик арыйдылар.

Татьяна Бурцева бэрт дириҥ ис хоһоонноох быыстапкатын туһунан суруналыыс Катерина Григорьева-Кэрэмэс Сыдьаай бу курдук сырдатта:

— «Саха Сирэ – Москва. Сүрэххэ чугас » быыстапка  — ураты. Дьон үксэ Татьяна Бурцеваны  суруналыыс, саха тэлэбиидэнньэтигэр сонуну ыытааччы, сарсыардааҥы «Саҥа күн» ханаал, уопсастыбаннай-бэлитиичэскэй биэриилэр  салайааччыта, бэйэ бырайыактаах ааптар быһыытынан үчүгэйдик билэллэр. Уруһуй, живопись туһунан Татьяна Бурцева ыра санаатын Москваҕа көһөн кэлиэҕиттэн олоххо киллэрбит.  Кини Суриков аатынан МГАХИ эбии профессиональнай үөрэхтээһин факультетын бүтэрэн, 5 сыл устата элбэхтик үөрэнэн-үлэлээн, айан-тутан, бу  түмүгүнэн тус экспозициятын арыйда.

Быыстапка Москва килбэйэр киинигэр дойдубут сорҕотугар, элбэх саха дьонун аартыгын тоҕойугар —  СӨ Бастайааннай бэрэстэбиитэлистибэтигэр ыытыллыбыта ордук күндү уонна суолталаах. Татьяна дьиҥ сахалыы куттаах, айымньыларыгар нуучча, сэбиэскэй классическай уруһуйун утумун тутуһар — бу дьүөрэтэ хас биирдии үлэтигэр өтө көстөр. Татьяна Бурцеваҕа эҕэрдэ тылларын бастакынан РФ Бэрэсидьиэнигэр СӨ Бастайааннай бэрэстэбиитэлэ, СӨ Бырабыыталыстыбатын Бэрэссэдээтэлин бастакы солбуйааччы Андрей Федотов эттэ.

Айар киэһэ үөрүүлээх чааһыгар СӨ култууратын уонна духуобунай сайдыытын миниистирэ Афанасий Ноев сырытта. Худуоһунньук айар үлэтигэр бэйэлэрин сыанабылларын ускуустуба эйгэтин идэтийбит дьоно эмиэ биэрдилэр: Арссыыйа художественнай академиятын бочуоттаах чилиэнэ Мария Рахлеева, ону тэҥэ Татьяна уһуйааччылара — РАХ чилиэн-кэрэспэдьиэнэ Дмитрий Петров, Суриков аатынан МГАХИ  преподавателлэрэ Эльмира Петрова, Александр Савеленко. Биир идэлээхтэрэ, бииргэ үөрэммит худуоһунньуктар эҕэрдэлэргэ кыттыстылар. Национальностар дьыалаларыгар Федеральнай ааҕыныстыба аатыттан Дарима Бороноева тыл эттэ, кини эрэгийэннэр  уонна киин куорат икки ардыларыгар маннык айар, култуурунай ситим  суолтатын бэлиэтээтэ. СӨ театральнай диэйэтэллэрин Сойууһун бэрэссэдээтэлэ, СӨ үтүөлээх артыыһа Айаал Аммосов Татьяна Бурцева  өрөспүүбүлүкэ култуурунай олоҕор кылаатын бэлиэтээтэ.

Биллэн турар, бу киэһэҕэ саамай чугас дьон  тылларын Татьянаҕа туһаайдылар. Оҕо саас дьүөгэлэрэ, бииргэ үөрэммит оҕолоро Лариса Степанова уонна Светлана Татьяна оҕо сааһыттан ахтыыларын үллэстибиттэрэ ураты сылаас уонна истиҥ иэйиини үөскэттэ.

Саха тэлэбиидэнньэтин «сулустара», ыытаачылара, биир идэлээхтэрэ  Татьяна Черемкина, Елизавета Чистоедова, Катерина Григорьева-Кэрэмэс Сыдьаай, Евдокия Избекова, Евгения Гурулева, Ольга Ушницкая — дьүөгэлэрин сылаастык эҕэрдэлээтилэр.

Худуоһунньук олоҕор сүрүн суолтаны уонна өйөбүлү чугас дьоно, кэргэттэрэ оҥороллор, киниэхэ айарыгар олук уураллар. Кэргэнэ Егор Васильевич, уола Александр, кийиитэ Ирина уонна сиэнэ Коля Бурцевтар барытын тэрийэн, ымпыгын-чымпыгын ситэрэн биэрэллэр. Татьяна кинилэргэ сылаастык, истиҥник махтанна.

«Саха Сирэ – Москва . Сүрэххэ чугас » диэн аҥардас ааспыт уус-уран суол отчуота эрэ буолбатах, ааптар икки дойдутугар: төрөөбүт Саха сиригэр уонна билигин олорор Москваҕа  тапталын билинэр. Ис туруга уоттаах-төлөннөөх, күүстээх  буоллаҕына,  киһи дьоҕурун  кыаҕын толору туһанан, хайа баҕар  сааска олох атын эйгэҕэ, бу сырыыга живописька, ускуустубаҕа ситиһиилээх буолуон сөбүн быыстапка арылыччы арыйда.