Табаҕаҕа диэри суол тутуутун 2027 сылга түмүктүөхтэрэ

Покровскайдыыр суолунан Табаҕаҕа диэри суол учаастага эһиил толору тутуллан бүтүөҕэ. Бу суол Өлүөнэ күргэтин тутуутун кытта ситимнээх уонна «Умнас» трассатын курдук эмиэ аныгы ирдэбилгэ эппиэттиир буолуоҕа. Бу туһунан өрөспүүбүлүкэ Ил Дархана Айсен Николаев «Саха» ВГТРК ханаалыгар «Прямой разговор» биэриигэ иһитиннэрдэ.

— «Умнас» суолун боппуруоһа Өлүөнэ күргэтин тутуутун кытта быһаччы ситимнээх. Технологияҕа сыһыаннаах быһаарыылар бары ылылыннылар. Былаан уларыйбата, үлэ эһиил түмүктэниэҕэ. Суол икки балаһалаах  уонна ууну аһарар тутуулардаах буолуоҕа. Аныгы, үчүгэй трасса буолуоҕа», — диэн Айсен Николаев эттэ.

Саха сирин баһылыга үлэ барыта биир кэмҥэ оҥоһуллубатын бэлиэтээтэ.

— «Кэлин суол иҥнэри түспэтин туһугар, буор сөптөөхтүк оннун булуохтаах. Ону таһынан, федеральнай бүддьүөттэн биһиги Суолбут пуондатыгар  көрүллэр үбүлээһин уонна пуонда харчынан туолуута биир кэмҥэ улахан кээмэйдээх үлэни оҥорорбутун хааччахтыырын умнуо суохтаахпыт. Сөптөөх болдьоххо үлэни түмүктүүр туһуттан, биһиги тэрээһини түһүмэхтэргэ араарабыт», — диэн Айсен Николаев эттэ.