Таһаҕаһы, дьону таһар тэрилтэлэр уматыгынан толору хааччылыннылар

Саха сирин сүрүн пассажирскай уонна таһаҕас тиэйэр тэрилтэлэрэ уматыгынан толору хааччыллан олороллорун Саха Өрөспүүбүлүкэтин тырааныспарга уонна суол хаһаайыстыбатыгар министиэристибэтэ иһитиннэрэр.

Биэдэмистибэ дааннайынан, Саха сирин тырааныспарын комплексыгар үлэ харгыстаныыта, тохтоон хаалыыта бэлиэтэммэтэ. Уматык балаансатын хонтуруоллааһын СӨ тырааныспарга министиэристибэтин иһинэн тэриллибит биэдэмистибэннэй ыстаапка сүктэриллэр.

Ыстаап исписэлиистэрэ күн ахсын быһыыны-майгыны кэтээн көрөллөр уонна туох баар уларыйыыларга суһаллык эппиэттэһэн, салаа үлэтин бигэ туруктаахтык тутар туһуттан таһар-тиэйэр хампаанньалары кытта мэлдьи сибээһи туталлар.