Төлөбүр судургутуйар: Балаҕан ыйын 1 күнүттэн маҕаһыыннарга биир кэлим QR-код киириэҕэ

Балаҕан ыйын 1 күнүттэн Арассыыйа маҕаһыыннарыгар уонна кафеларыгар харчыны төлүүргэ биир кэлим (универсальнай) QR-код киириэҕэ. Бу туһунан ТАСС-ка Судаарыстыбаннай Дуума дьоҕус уонна орто урбаан кэмитиэтин бэрэссэдээтэлэ Александр Демин иһитиннэрдэ.

Билигин каассаҕа араас бааннартан хас даҕаны код оннугар биир эрэ код үлэлиэҕэ. Атыылаһааччы төлөбүр ханнык баанынан барыахтааҕын бэйэтэ талар кыахтаныаҕа. Дьоҥҥо бу – бастатан туран, олус табыгастаах.

Оттон урбаанньыттарга – бааннар күрэстэһиилэрин суотугар ороскуот аччыыр. Ол эбэтэр, урбаанньыт биир эрэ эквайринг-хампаанньаҕа баайыллан хаалбат буолар.

Александр Демин бэлиэтииринэн, биир кэлим QR-код киириитэ төлөбүр ырыынагар бары кыттааччыларга тэҥ кыаҕы биэрэринэн, күрэстэһии үүнүүтүн хааччыйыахтаах.