“Төрүт үҥкүү алгыстаах киэһэтэ” — ыһыахха бэлэмнэнии тыына

Бу күннэргэ киин куоракка Туймаада ыһыаҕар бэлэмнэнэн, араас тэрээһиннэр буола тураллар.

Ол курдук, бэс ыйын 6 күнүгэр А.Е. Кулаковскай-Өксөкүлээх Өлөксөй аатынан Норуоттар доҕордоһууларын дьиэтигэр “Төрүт үҥкүү алгыстаах киэһэтэ” диэн Култуура сылыгар анаммыт Ыһыахха бэлэмнэнии улахан бэстибээлэ буолаары турар. Бу туһунан дьоро тэрээһини тэрийээччи, сахаларга бохо-истиили бастакынан олоххо киллэрбит бохо-истиил таҥас дизайнера Анжелика Кириллина маннык билиһиннэрдэ:

— Сарсыарда 10 чаастан киэһэ 19 чааска диэри “Саха-Бохо фест” диэн саха таҥаһыгар саҥа хайысха устуоруйатын сырдатар бэстибээл ыытыллыаҕа. Бу көҥүл санаалаах дьон түһүлгэтигэр күнү быһа айылҕа матырыйаалыттан оҥоһуллубут дизайнерскай малы-салы атыылыыр дьаарбаҥка буолуоҕа. Манна ыһыахха кэтэр эсклюзив-моделлар кэллиэксийэлэрэ  баар буолуоҕа. Тыыннаах доҕуһуолунан DJ-дар сеттара, трайбл-үҥкүү, хомус тыаһа, хабарҕа ырыата, фольклор араас көрүҥнэрин таһынан, керамиканан, уруһуйунан, киэргэтэн оҥорууга, илиинэн өрүүгэ маастар-кылаастар ыытыллыахтара. Ол быыһыгар таро хаартынан таайыы, худуоһунньук быыстапката уонна хаартыскаҕа түһүү зоналара үлэлиэхтэрэ. Бу күн бэстибээлгэ күөх сайыны көрсө биир санаалаахтары кытта алтыһыы буолуоҕа. Бэстибээлгэ сылдьыы – босхо.

Киэһэ 17 чаастан “Төрүт үҥкүү алгыстаах киэһэтэ” дьоро киэһэҕэ мин саха эстрадатын чаҕылхай сулустарыгар тикпит «Богемная Якутия» диэн бастакы кэллиэксийэбин аатырбыт артыыстар сыанаҕа тахсан көрдөрүөхтэрэ. Саамай кэрэхсэбиллээҕэ, бэс ыйын 6 күнүн кытары сибээстээн, алта бохо-бренд таҥас оонньонуоҕа. Маны бириис быһыытынан «дьоллоох» миэстэҕэ тиксибит ылыаҕа.  Маны тэҥэ дьоһун, хорсун дьоҥҥо анаммыт ураты таҥастар, SAKHABOHO брендин күннээҕи таҥастара, ыһыахха кэтэргэ аналлаах эксклюзивнай таҥастар, айылҕа кэрэтиттэн сиэттэрэн айбыт көстүүмнэрбин көрдөрүү буолуоҕа. Аан бастаан сыанаҕа дизайнер быһыытынан биирдиилээн тикпит таҥаспын кэтэн, үлэлии сылдьар ойууннар кыттыахтара. Кэнсиэргэ билиэттэр Норуоттар доҕордоһууларын каассатыгар атыыланаллар. Бэс ыйын 6 күнүгэр кэлиҥ – саха тыынынан дуоһуйа тыыныҥ, ис күүһүнэн, сонун истиилинэн уонна аптаах эйгэтинэн ыһыахха бэлэмнэниҥ!