Тимэх от

Клара уонна Петр Токумовтар «Төрөөбүт дойдубут эмтээх үүнээйилэрэ» кинигэлэрин көрөр, мантан сүбэ-ама ылан туһанар дьон элбэх буолуохтаах. Манна эмтээх үүнээйилэри хомуйууга, хатарыыга, харайыыга сүбэлэр эмиэ бааллар.

Бүгүн тимэх от (пижма) туһунан сүбэлэриттэн билиһиннэрэбит.

Тимэх от ходуһаҕа, быраҕыллыбыт бааһынаҕа, тыа, суол кытыытыгар, өтөххө сөбүлээн үүнэр.

Умнаһын үрдүгэ 40-100 см тиийэр, уустук оҥоһуулаах куорсуннуҥу тырыттаҕас сэбирдэхтээх. Аатын курдук, тимэххэ маарынныыр араҕас өҥнөөх сибэккилэрдээх. От ыйыттан күһүҥҥээҥҥэ диэри сибэккилэнэр. Бу кэмҥэ хомуйан салгыннаах, күлүк сиргэ куурдуллар.

Көөнньөһүгүн быар, оһоҕос араас ыарыыларыгар, ис ыарыйдаҕына тутуннахха, үчүгэйдик көмөлөһөр. Бу от сибэккилэринэн оҥоһуллубут эмп сүрэх үлэтин тупсарар, хаан баттааһынын үрдэтэр, үөс тахсыытын күүһүрдэр дьайыылаах, ас буһарар уорган үлэтигэр туһалаах.

Биир улахан ньуоска оту биир ыстакаан оргуйбут ууга чаас аҥаара туруоран баран, күҥҥэ үстэ-түөртэ биирдии улахан ньуосканан иһиллэр.

Бу үүнээйини кыра саастаах оҕоҕо, ыарахан дьахтарга туттар көҥүллэммэт. Өр кэмҥэ эмтэннэххэ, тимэх оттон сүһүрүөххүн сөп. Онон быраас сүбэтэ хайаан да наада.

Клара, Петр Токумовтар,

«Төрөөбүт дойдубут эмтээх үүнээйилэрэ» кинигэлэриттэн.