Тирэх пууннар нэдиэлэ иһигэр 264 баһыылканы байыастарга туттардылар

Байыаннай дьайыы буола турар сиригэр-уотугар тирэх пууннар үлэһиттэрэ нэдиэлэ устатыгар 12 сырыыны оҥороннор байыастарга 264 аадырыстаах баһыылканы тиэрдибиттэр.

—Тирэх пууҥҥа  байыастарга аймахтарыттан, биир дойдулаахтарыттан, кэллиэгэлэриттэн, бииргэ сулууспалаабыт байыаннай доҕотторуттан кэлбит баһыылкалары күн ахсын наардыыллар уонна тиэрдэллэр. Бу күннэргэ биһиги 190-тан тахса баһыылканы туттубут, — диэн байыаннай дьайыы сиригэр-уотугар тирэх пуун координатора «Юстас» иһитиннэрдэ.

Спикер этэринэн, РФ Сэбилэниилээх Күүстэрин подразделениеларыгар Донбааһы өйүүр Хотугулуу-Илиҥҥи пуонда уонна Саха сирин атын тэрилтэлэрин өйөбүллэринэн өссө түөрт көлө аҕалыллыбыт.

—Тирэх пуун өрөмүөннүүр бөлөҕүн мэхээнньиктэрэ нэдиэлэ иһигэр түөрт «Якт-Сокол» квадроцикллары оҥорон стройга төнүннэрдилэр. Билигин 14 байыаннай тиэхиньикэни өрөмүөннүүллэр, — диэн этэр «Юстас». Кини өрөспүүбүлүкэттэн кэлэр ирдэбиллэринэн сураҕа суох сүппүт байыастары көрдөөһүн тиһиктээхтик ыытылларын иһитиннэрэр.

Санатан эттэххэ, байыаннай дьайыы байыастарын өйүүр үлэни Ил Дархан, «Биир ньыгыл Арассыыйа» баартыйа эрэгийиэннээҕи салаатын сэкирэтээрэ Айсен Николаев салайар «Вместе к Победе!» хамыыһыйата өйүүр.

Сиһилии: https://www.sakha.gov.ru/news/43521

СӨ Ил Дарханын уонна Бырабыыталыстыбатын пресс-сулууспата