Толлуман уонна Эрсан Тимофеевтар – муҥутуур кыайыылаахтар

Амма улууһугар быйыл Тыа хаһаайыстыбатын сылынан биллэриллибитэ. Ол чэрчитинэн нэһилиэктэр икки ардыларыгар күрэхтэр биллэриллибиттэрэ.

— Итинтэн бастакы күрэх кулун тутар 3 күнүгэр Мээндиги нэһилиэгэр Лев Спиридонович Старостин аатынан “Я – фермер” диэн оскуола оҕолоругар бырайыак көмүскээһинэ буолла. Онно уопсайа оскуола 50 оҕото, 18 салайааччы кытыннылар. Уопсайа 27 бырайыагы торумнаабыттар. Бу куонкуруска Соморсун нэһилиэгин оскуолатыттан үс хамаанда бырайыагын көмүскээтэ. Ол түмүгэр, “Мин дьиэ көтөрүн иитэбин” диэн бырайыактаах убайдыы-бырааттыы Толлуман (4 кыл.) уонна Эрсан (6 кыл.) Тимофеевтар муҥутуур кыайыылаах буоланнар, 50 тыһыынча солкуобай харчынан бириэмийэлэннилэр уонна дипломунан наҕараадаланнылар. Кинилэргэ салайааччылара Ирина Вячеславовна Аммосова, төрөппүттэрэ күүс-көмө буоллулар. Тимофеевтар биэс оҕолоох эдэр ыаллар. Бу ыаллар  сайыннары-кыһыннары дьиэлэрин таһыгар куурусса, кус, индюк, хоруолук ииттэллэр, оҕолор кыра эрдэхтэриттэн тэбис-тэҥҥэ хаһаайыстыбаларын көрсөр буоланнар, бырайыактарын чаҕылхайдык көмүскээтилэр. Оҕолорбутунан киэн туттабыт, өссө да ситиһиилэри баҕарабыт! – диэн үөрүүлээх сонунун кытта нэһилиэк тыа хаһаайыстыбатын исписэлииһэ Нюргуяна Протопопова үллэһиннэ.

Хаартыскалары: Н.Протопопова ыытта.