Тутуу-коммунальнай тиэхиньикума байыаска УАЗ «Хантер» биэрдэ

Дьокуускайдааҕы тутуу-коммунальнай тиэхиньикума УАЗ «Хантер» массыынаны байыаннай дьайыыга сылдьар кинилэргэ үлэлээбит кэллиэгэлэригэр биэрдилэр.

—Биһиги кэлэктиибинэн билигин байыаннай дьайыыга сылдьар үлэһиппитигэр бу көлөнү биэрэргэ быһаарынныбыт. Быһаарыы ылыллыбытын кэнниттэн Донбааһы өйүүр уона көмөлөһөр Хотугулуу-Илиҥҥи пуонда дириэктэрин кытта сибээстэспиппит, кини көмөтүнэн кылгас кэм иһигэр массыынаны илдьии тэриллибитэ. Массыынабыт үлэһиппитигэр тиэрдиллибит. Кини көлөнү тутан махтанна уонна билигин онон айанныыр, — диэн үөрэх тэрилтэтин дириэктэрэ Евгений Попов кэпсээтэ.

Тиэхиньикум дириэктэрэ байыаннай дьайыы кыттыылаахтарын тиһиктээхтик өйүүллэрин бэлиэтээтэ. Кэлэктиип гуманитарнай көмөнү оҥорууга куруук кыттар.

Байыаннай сулууспалаахтарга көмөлөрүн сэргэ, тиэхиньикумҥа байыаннай сулууспалаахтар дьиэ кэргэттэрин чилиэннэрин өйүүр дьаһаллар олоххо киллэриллэллэр. Байыаннай дьайыы кыттыылаахтарын дьиэ кэргэттэрин устудьуоннарыгар сокуонунан көрүллүбүт социальнай өйөбүллэр, ол иһигэр социальнай истипиэндьийэ уонна аадырыстаах көмө оҥоһуллар.

Маны сэргэ, тэрилтэҕэ байыаннай дьайыы кыттыылаахтарын уонна кинилэр дьиэ кэргэттэрин чилиэннэрин оҕолоро үөрэххэ киирэргэ быраабынан туһанар кыахтаахтар.  Бу дьаһал кэлэр приемнай хампаанньаҕа эмиэ үлэлиэҕэ.

Евгений Попов бэлиэтээбитинэн, байыаннай сулууспалаахтары уонна кинилэр чугас дьоннорун өйөөһүн боппуруостара тиэхиньикум дьаһалтатын уонна кэлэктиибин хонтуруолугар куруук бааллар. Бу хайысхаҕа үлэлэрэ салҕанар.

Сиһилии: https://www.sakha.gov.ru/news/52836

СӨ Ил Дарханын уонна Бырабыыталыстыбатын пресс-сулууспата