Тыа хаһаайыстыбатын бэтэрээннэрэ Кыайыы күнүн бииргэ көрүстүлэр

Бу күннэргэ Тыа хаһаайыстыбатын бэтэрээннэрин уопсастыбаннай тэрилтэтэ бэйэтин бэтэрээннэригэр анаан Дьокуускай куоракка Эстрада тыйаатырыгар Аҕа дойду Улуу сэриитигэр Кыайыы 81-с сыллаах үбүлүөйүгэр аналлаах бырааһынньыгы тэрийэн ыытта.

Бэтэрээннэр салалталарын бэрэссэдээтэлэ Розаида Гудуева бэтэрээннэри уонна ыалдьыттары эҕэрдэлээтэ: «Биһиэхэ хас биирдии бэтэрээн – тыыннаах история. Эһиги дойдугутугар тыа хаһайыстыбатын өрө тардыбыккыт. Эһиэхэ улахан махтал тылларын этэбин», — диэн Розаида Гудуева бэтэрээннэргэ туһаайан эттэ. Тыа хаһайыстыбатын уонна ас бэлиитикэтин миниистирэ А.А. Александровка ыкса бииргэ үлэлэһэллэрин уонна үтүө сыһыаннарын иһин махталын биллэрдэ.

Аҕа дойду Улуу сэриитигэр өлбүт-сүппүт саллааттарга курутуйуу бэлиэтэ, чуумпуран иһийии мүнүүтэтэ биллэрилиннэ.

СӨ тыа хаһайыстыбатын уонна ас бэлиитикэтин миниистирэ Артем Александров бэтэрээннэри эҕэрдэлээтэ уонна үбүлүөйдээхтэргэ наҕараадалары туттарда.

«Улуу Кыайыы күнүнэн эһигини истиҥник эҕэрдэлиибин, бу күн дьиэ кэргэҥҥэ уонна хас биирдии киһиэхэ улахан суолталаах. Сэрии кэнниттэн дойдуну чөлүгэр түһэрии, тыа хаһаайыстыбатын өрө тардыы сылларыгар бэйэлэрин кылааттарын киллэрбит бар дьоммор ис сүрэхпиттэн дириҥ махталбытын тириэрдэбит», — диэн эттэ Артем Александров.

Ону таһынан, быйыл сүдү дьоммут – судаарыстыбаннай уонна уопсастыбаннай диэйэтэл, Саха сирин тыа хаһайыстыбатын министиэристибэтин бастакы солбуйааччыта – 1986-1988 сылларга миниистир Климент Иванов 90 сааһа, Арассыыйа Үлэ Дьоруойа Михаил Готовцев 80 сааһа, ону тэҥэ племенной сулууспа тэриллибитэ 75 сыла бэлиэтэнэрин эттэ миниистир. Миниистир быйыл от ыйын 1-4 күннэригэр Дьокуускайга племенной сулууспа 75 сылыгар аналлаах научнай-практическай кэмпириэнсийэ ыытылларын биллэрдэ. Бэтэрээннэр тыа хаһаайыстыбатын сайдыытын уонна кэлэр былааннар тустарынан сонуннары ураты болҕомтолоохтук, долгуйан туран иһиттилэр – хас биирдии маннык иһитиннэрии кинилэр сүрэхтэригэр олохторун анаабыт дьыалаларыгар киэн туттуу иэйииэ буолан киирэр.

Маны сэргэ бэтэрээннэри «Ытык Сүбэ» сэрии, үлэ, Сэбилэниилээх күүстэр уонна быраабы араҥаччылыыр уорганнар бэтэрээннэрин (биэнсийэлээхтэрин) уопсастыбаннай тэриллиилэрин бэрэссэдээтэлин солбуйааччы Аркадий Саввинов, биһиги ытыктабыллаах бэтэрээннэрбит – өрөспүүбүлүкэ биллэр уопсастыбаннай уонна судаарыстыбаннай диэйэтэлэ К.Е. Иванов уонна тыа хаһаайыстыбатын оҥорон таһаарыытын тэрийээччи И.С. Иванов уо.д.а. эҕэрдэлээтилэр.

Бырааһынньыктааҕы тэрээһиҥҥэ Ульяна Лугинова уонна Анастасия Павлова спонсордардаан номинациялар туттарылыннылар:

“Саамай кырдьаҕас кыттыылаах” — 93 саастаах көхтөөх бэтэрээҥҥэ П.Н. Исаевка, «Саамай бөҕө тирэхтээх – уһун үйэлээх ыал” — 58 сыл бииргэ олорбут Аркадий Пудович уонна Клара Дмитриевна Васильевтарга, “Уопсастыбаннай тэрилтэ саамай эдэр чилиэнэ” – З.П. Колодезниковка, өссө биир номинация Ульяна Лугинова настаабынньыгар – М.И. Новгородоваҕа туттарылынна.

Бэтэрээннэр Елена Кириллина, Тамара Филиппова, Дмитрий Шадрин ырыаларынан тэрээһини киэргэттилэр Талааннаах ырыаһыттар Альбина Дегтярева, Тамара Попова, Константин Степанов уонна Василий Новоприезжай кэрэ куоластарынан ырыаларын бэлэхтээтилэр.

Бу киэһэ бэтэрээннэр уруккуну-хойуккуну санаан-ахтан аастылар, ырыа ыллаатылар уонна хаартыскаҕа түстүлэр.

Тэрээһин Улуу Кыайыы бырааһынньыктааҕы оһуокайынан түмүктэннэ. Тыа хаһаайыстыбатын бэтэрээннэрин уопсастыбаннай тэрилтэтин бырабылыанньата Эстрада тыйаатырын кэллэктиибигэр бырааһынньыктааҕы киэһэни тэрийбитин, ырыанан-тойугунан киэргэппитин иһин махтанар.