Тыа хаһаайыстыбатын үлэһиттэригэр дизельнай уматыгы үллэрдилэр

Саха сиригэр сүөһү аһылыгын бэлэмниир хампаанньаны ыытарга тыа хаһаайыстыбатын үлэһиттэригэр дизельнай уматыгынан хааччыйыы үлэтэ барар.

Бастакы түһүмэххэ 19 муниципальнай оройуон уонна Дьокуускай куорат хаһаайыстыбаларын икки ардыларыгар 844,5 туонна уматык үллэрилиннэ, бу от ыйынааҕы наадыйыы 20 бырыһыаныгар тэҥнэһэр.

Салгыы тиэйии өрөспүүбүлүкэҕэ уматык саҥа баартыйалара кэлиилэринэн ыытыллыаҕа. Бу туһунан от ыйын 16 күнүгэр брифиҥҥэ Саха Өрөспүүбүлүкэтин Тыатын хаһаайыстыбатын миниистирэ Артем Александров иһитиннэрдэ.

Миниистир этэринэн, от ыйын 11 күнүттэн «Туймаада-Нефть», «Саханефтегазсбыт», «Сервис Ойл» уонна «Сибойл» хампаанньалар дизельнай уматык бастакы сөбүлэһиллибит кээмэйин биэрэн саҕалаатылар.

«Сүөһү аһылыгын бэлэмниир хампаанньа былаан быһыытынан барар. Үөскүүр боппуруостары түргэнник быһаарар туһуттанй тыа хаһаайыстыбатын үлэлэрин салайар-түмэр ыстаап үлэлиир. Муниципальнай тэриллиилэр баһылыктара уонна тыа хаһаайыстыбатын управлениетын салайааччылара нэдиэлэ аайы хампаанньа хайдах барарын туһунан иһитиннэриини биэрэллэр — ити наадалаах быһаарыылары кэмигэр ыларга кыах биэрэр», — диэн бэлиэтээтэ Артем Александров.

Миниистир бүгүҥҥү күҥҥэ сөбүлэһиллибит уматык кээмэйэ бүтэһиктээх буолбатаҕын бэлиэтээтэ. Уматык саҥа баартыйалара кэлэн истэҕин аайы дизельнай уматык эбии кээмэйдэрэ муниципальнай тэриллиилэр икки ардыларыгар тыа хаһаайыстыбатын үлэһиттэрин наадыйыыларыгар сөп түбэһиннэрэн үллэриллиэхтэрэ.

Сүөһү аһылыгын бэлэмниир хампаанньа тохтоло суох барарын хааччыйар туһуттан, Саха Өрөспүүбүлүкэтин Тыатын хаһаайыстыбатын министиэристибэтин уонна Гражданскай оборуонаҕа уонна нэһилиэнньэ олоҕун-дьаһаҕын куттала суох буолуутун хааччыйыыга министиэристибэтин бииргэ таһаарбыт бирикээстэринэн тыа хаһаайыстыбатын үлэһиттэригэр уматыгы анал иһиккэ кутан биэрии бэрээдэгэ бигэргэтилиннэ. Докумуон бары муниципальнай тэриллиилэргэ тиэрдилиннэ.

«Сир оҥоруутунан дьарыктанар сүрүн улуустарга сүөһү аһылыгын бэлэмнээһиҥҥэ былааннаммыт көрдөрүүлэри толоруу күүтүллэр. Хотугу уонна Арктика оройуоннарыгар гидрологическай быһыы-майгыны уонна халаан уутун содулун учуоттаан барыллааһын  чопчуланыаҕа. Наада буоллаҕына хаһаайыстыбалары отунан-бурдугунан хааччыйыыга эбии быһаарыылар ылыллыахтара. Бүгүҥҥү күҥҥэ өрөспүүбүлүкэҕэ номнуо 884 туонна от бэлэмнэннэ», — диэн иһитиннэрдэ Артем Александров.

Саха Өрөспүүбүлүкэтин Ил Дарханын уонна  Бырабыыталыстыбатын пресс-сулууспата

Сиһилии: https://www.sakha.gov.ru/news/56807