Түһүлгэ оһуохайдьыттары түмтэ

Суоттуга нэһилиэкпит ыһыаҕа буолан ааста. Олус сэргэхтик, өрө көтөҕүллүүлээхтик.

Ыһыах дьонун, сыллата буоларын курдук, олохтоох бибилэтиэкэлэр бэлэмнээбит быйылгы ситиһиилэри, умнуллубат түгэннэри кэпсиир, ырытар репортаһа түмэ тарта. Түөлбэлэринэн сэлэлии хаамыы ыытыллан хас биирдии түөлбэ дьоно көхтөөх кыттыыларын көрдөрдө.

Быйылгы ыһыахпытыгар талааннаах ыччаппыт Сандал Захаров ис сүрэҕиттэн толорон сирин-дойдутун, бар дьонун алҕаата.
Ыһыах добун чааһыгар нэһилиэкпит баһылыга Баишев В.П. тыл этэн, олохтоохтору Үрүҥ Тунах ыһыаҕынан эҕэрдэлээтэ, бастыҥтан бастыҥнарга наҕараадалары туттарда.

Ырыаҕа, үҥкүүгэ бастыҥнар кэнсиэртэрин кэрэхсээн көрдүбүт. Ытыс тыаһа уҕараабата.  Аны туран, үгэс быһыытынан сылын аайы олохтоох дьаһалта ыытар түөлбэлэринэн түһүлгэ көрүүтэ барыбытын сэргэхситтэ. Бииртэн-биир кыһамньылаахтык оҥоһуллубут, киэргэтиллибит түһүлгэ болҕомтоту тарта. «Суоттукаан саҕаттан», «Сайылык оҕолоро» куонкурустар, бастыҥ оһуохайдьыттар күрэстэрэ көхтөөх буолла. Нэһилиэк дьоно-сэргэтэ турунан кытыннылар. Сайыҥҥы сибиэһэй салгынтан, күнтэн, оһуохайтан сэниэ ылабыт диэн үөрүүлэрэ улаатта.

Кус быһый, ат бөҕө, сымса дьоммут күрэхтэһиилэрэ, түөлбэлэр икки ардыларыгар сүүрүүгэ эстэпиэтэ элбэх көрөөччү, ыалдьааччы болҕомтотун тардыан тарта. Ыһыах сүргэбитин көтөхтө.

Раиса Черкашина

Хаартыскаҕа Валентина Патрасова түһэриитэ.

Суотту, Уус Алдан.