«Түргэнник байаары» Дьокуускай олохтооҕо «Аксолот» пирамидаҕа албыннатта

Полиция дьуһуурунай чааһа иһитиннэрбитинэн, кибер-түөкүттэр илиилэриттэн эмсэҕэлээбит биир киһиттэн сайабылыанньа киирбит. Дьокуускай куорат 60 саастаах биэнсийэлээх олохтооҕо «Axolot» («Аксолот») диэн үп-харчы бырайыагар 1 мөлүйүөнтэн тахса солкуобай харчытын ыытан кэбиспит.

Саха сирин олохтоохторугар болҕомтолоох буолалларыгар ыҥыраллар. Бу бырайыак үп-харчы пирамидата бэлиэлэрдээх! Арассыыйа Киин баана  өссө 2025 сыл атырдьах ыйыгар кинини маннык бэлиэлэрдээх кутталлаах тэрилтэлэр испииһэктэригэр киллэрбитэ.

Бу чахчынан Арассыыйа Федерациятын Холуобунай кодексатын 159-с ыстатыйатын 4-с чааһынан («Түөкүннээһин») холуобунай дьыала тэрилиннэ.

Күндү ааҕааччылар, бу интэриниэт-платформа аатын өйдөөн хаалыҥ уонна дьоҥҥо-сэргэҕэ тарҕатыҥ. Түргэнник уонна олус барыстаахтык эбии харчы өлөрөр туһунан эрэннэриилэргэ хаһан да итэҕэйимэҥ, сэрэхтээхтик сыһыаннаһыҥ. Түөкүттэргэ үпкүтүн-харчыгытын бэлэхтээмэҥ!