Түүлээххэ бөртөлүөт тиийдэ

Бүгүн Уус Алдан улууһун саамай ыраах сытар нэһилиэгэр —  Түүлээххэ   бөртөлүөт бастакы рейсин оҥордо.  

Быйыл тохсунньуга улуус баһылыгын отчуоттуур мунньаҕар олохтоохтор саас суол суох кэмигэр айанныырга, таһаҕас таһарга кыһалҕалары көрсөллөрүн этэн туран, бөртөлүөт сырыыта наадатын туруорсубуттара.

Уус Алдан улууһун дьаһалтата бу туруорсууну ылынан, дьон кыһалҕатын өйдөөн «Полярные авиалинии» хампаанньаҕа сайаапка түһэрэн, былаан быһыытынан ыам ыйын 6 уонна 25 күннэригэр субсидиялаах икки рейси оҥорору ситиспитэ.

Бүгүн  бастакы бөртөлүөтүнэн Дьокуускай куораттан 17 киһи, ол иһигэр эпэрээссийэ  кэнниттэн доруобуйаларын чөлүгэр түһэрбит дьон,  Бороҕонтон почтаҕа кэлбит суруктар, биэнсийэ, бырааһынньыктааҕы ас-үөл, наадалаах туттар мал-сал  тиийэн олохтоохтор сэргэхсийдилэр.

Улуус дьаһалтатын пресс-сулууспата