Учуонайдар Оҥоһуу өйү иноагеннары уонна экстремистары буларга туһаныахтара

Соҕуруу Ураллааҕы судаарыстыбаннай университет  учуонайдара ураты систиэмэни айан таһаардылар. Саҥа сервис Оҥоһуу өй көмөтүнэн араас тиэкистэргэ иноагеннары, экстремистары уонна Арассыыйаҕа үлэлииллэрэ баҕарыллыбат  тэрилтэлэри бэйэтэ булан таһаарар кыахтаах.

Сервис хайдах үлэлиирий?

Университет пресс-сулууспата иһитиннэрэринэн, сервис PDF эбэтэр TXT форматтаах докумуоннартан дьон уонна тэрилтэлэр ааттарын, наадалаах матырыйааллары бэйэтэ булан ылар. Онтон ону РФ Юстицияҕа министиэристибэтин  уонна Росфинмониторинг официальнай баазаларын кытта тэҥнээн көрөр уонна сиһилии отчуоту оҥорон таһаарар.

Саҥа систиэмэ судаарыстыба биэс сүрүн официальнай баазатын кытта ситимнээхтик үлэлиир:

1. Иноагеннар (РФ Юстицияҕа министиэристибэтин испииһэгэр киирбит дьон уонна тэрилтэлэр);
2. Баҕарыллыбат тэрилтэлэр (Арассыыйаҕа үлэлииллэрэ бобуллубут омук уонна норуоттар икки ардыларынааҕы тэрилтэлэр);
3. Экстремистскай тэрилтэлэр (экстремистскай диэн билиниллибит уопсастыбаннай уонна итэҕэл түмсүүлэрэ);
4. Экстремистскай матырыйааллар (бобуллубут кинигэлэр, киинэлэр, ырыалар уо.д.а.);
5. Терроризмҥа сыһыаннаах дьон уонна тэрилтэлэр (Росфинмониторинг испииһэгэ).

Бүтэһик быһаарыыны — киһи ылынар

Айааччылар бэлиэтииллэринэн, сервис тиэкискэ баар дьоҥҥо эбэтэр тэрилтэлэргэ туох да статуһу иҥэрбэт уонна буруйдаабат. Сүрүн сыала — бэрэбиэркэлиир исписэлиискэ официальнай баазанан тиэкис уустук, саарбахтанар чаастарын булан биэрии.

— «Бу киһини буруйдуур эбэтэр эккирэтэр систиэмэ буолбатах. Сервис тиэкискэ баар ааттары баазаны кытта тэҥнээн эрэ көрөр. Оттон бүтэһик быһаарыыны киһи бэйэтэ ылынар», — диэн ЮУрГУ «ВиртУм» Оҥордуу өй киинин доцена Владимир Сурин быһаарар. Сервис баазата күн аайы олохтоох бириэмэнэн түүн 3:00 чааска аптамаатынан саҥардыллан иһэр. Оттон наада буоллаҕына, исписэлиис баазаны бэйэтэ, илиитинэн саҥардыан эмиэ сөп. Саҥа систиэмэ докумуоннары кытта үлэлиир тэрилтэлэргэ, бэчээт уорганнарыгар уонна сокуону тутуһууну кэтээн көрөр сулууспаларга улахан көмө буолуоҕа диэн учуонайдар эрэнэллэр.