УГМС СЭРЭТЭР: кэккэ улуустарга самыырдыыр, күүстээх силлиэ түһэр

УГМС саайтын иһитиннэриитинэн, бүгүн, от ыйын 9 күнүгэр, Ленскэй Өлүөхүмэ, Сунтаар, Ньурба, Үөһээ Бүлүү, Бүлүү оройуоннарыгар самыырдыыр (сөҥүү кээмэйинэн 11 мм уонна онтон элбэх). Оттон Өлөөҥҥө, Мииринэйгэ, Эдьигээҥҥэ хотугулуу-арҕааттан күүстээх силлиэ тыал сөкүүндэҕэ 15-20 миэтэрэҕэ диэри күүһүрүөҕэ.

Уотунан хааччыйар уонна сибээс эбийиэктэригэр саахал тахсар куттала улаатар. Мөлтөхтүк бөҕөргөтүллүбүт эргэ тутуулар, угуйук уонна иһитиннэрэр щиттэр сууллуохтарын, дьиэлэр кырыыһалара алдьаныан сөп.

Өрөспүүбүлүкэтээҕи уонна олохтоох суолталаах суолларга массыына харыылара, ону тэҥэ аэропуордар үлэлэрэ кэһиллэр куттала үөскүүр.

Нэһилиэнньэҕэ сүбэлэнэр:

• Ыраах айантан туттунуҥ эбэтэр суолга айан кэмигэр сэрэхтээх буолуҥ;
• Массыына суолун, трассаны туоруурга ордук сэрэхтээх буолуҥ;
• Уулуссаҕа сылдьар кэмҥэ сэрэхтээх буолуҥ, оҕолору көрүүтэ-истиитэ суох хаалларымаҥ.