Уһуйааҥҥа — «Дублер күнэ»

Атамайга «Радуга» уһуйааҥҥа «Дублер күнэ» диэн тэрээһин буолла.

Манна В.Д. Лонгинов аатынан Атамай орто оскуолатын психолого-педагогическай кылааһын 15 үөрэнээччитэ кэлэн кыттыыны ылла. Кинилэр бу күн иитээччи оруолугар киирэннэр, күннээҕи эрэсиими толору солбуйдулар, оонньоттулар, кыра сорудахтары толоттордулар. Уһуйаан иитээччилэрэ кинилэргэ сүбэ-ама биэрдилэр, көрө-истэ сырыттылар. Ол курдук, тылы сайыннарар оонньуулары, күһүҥҥү тиэмэҕэ аппликацияны, хамсаныылаах оонньуулары кырачааннар олус сөбүлээтилэр.

Бэлиэтээн эттэххэ, маннык тэрээһин хаһыс да сылын ситиһиилээхтик ыытыллар. Бу үөрэнээччи идэтин таларыгар төһүү буолар. Маны сэргэ, уһуйаан уонна оскуола ыкса ситимнээхтик үлэлииллэр, саҥаны, сонуну, туһалааҕы тобулаллар. Түмүккэ оскуола үөрэнээччилэрэ уонна уһуйаан иитээччилэрэ санааларын үллэһиннилэр. Үөрэнээччилэр иитээччи идэтэ олус эппиэтинэстээҕин эттилэр. Бу күн уһуйаан иитээччилэригэр «Самообразование, как источник профессионального роста современного педагога» диэн педагогическай чаас ыытылынна.

Раиса Иванова,

Атамай, Горнай.

Хаартыскаҕа ааптар түһэриитэ