Уһук Илиҥҥэ Саха сирин баһаарынайдара бастаатылар

Владивосток куоракка «Аквамарин» диэн халлааны таарыйар үрдүк тутуулаах дьиэҕэ гаас уонна буруо дьайыытыттан көмүскэнэр сулууспа исписэлиистэрин ортотугар түргэнник үөһэ тахсыыга «Уһук Илиннээҕи вертикаль» диэн кыраайдааҕы уонна эрэгийиэннэр икки ардыларынааҕы күрэхтэһии ыытылынна. Күрэххэ 18 хамаанда састаабыгар барыта 146 киһи кытынна.

Кыттааччылар баһаарынай идэтийбит таҥастарын таҥнан уонна ыар анал тэриллэрин сүгэн, үрдүк дьиэ кирилиэһинэн саамай түргэнник үөһэ тахсарга күрэхтэстилэр.

Уһук Илиннээҕи федеральнай уокурук субъектарын ортотугар хамаанданан комплекснай түмүккэ миэстэлэр маннык түҥэтилиннилэр:

* Бастакы миэстэни — Арассыыйа Ыксаллаах быһыыга-майгыга министиэриэстибэтин Саха Өрөспүүбүлүкэтин Сүрүн дьаһалтата ылла;

* Иккис миэстэҕэ — Арассыыйа ЫБМ Бурятиятааҕы Сүрүн дьаһалтата тигистэ;

* Үһүс миэстэҕэ — Арассыыйа ЫБМ Забайкальскай кыраайдааҕы Сүрүн дьаһалтата таҕыста.

Биирдиилээн күрэххэ (Уһук Илин салааларын ортотугар):

🥇 1 миэстэ – Дьулустаан Елисеев, Саха сирэ (бириэмэтэ: 05:26,7);

🥈 2 миэстэ – Павел Романов, Приморскай кыраай (бириэмэтэ: 05:39,8);

🥉 3 миэстэ – Александр Харлампьев, Саха сирэ (бириэмэтэ: 05:49,5).

Саха сирин баһаарынайдара бэйэлэрин үрдүк бэлэмнээхтэрин өссө төгүл чаҕылхайдык бигэргэттилэр уонна Уһук Илин уокуругун үрдүнэн саамай бастыҥнарынан ааттаннылар.