Уһук Илиннээҕи пуорумҥа төрүт норуоттар үгэстэрин көрдөрүөхтэрэ

Балаҕан ыйын 1-4 күннэригэр Владивосток куоракка XI Уһук Илиҥҥи экэнмиичэскэй пуорум (ВЭФ) ыытыллыаҕа. Бу улахан тэрээһин чэрчитинэн «Владивосток кэмнэрэ» диэн култуура бэстибээлэ буолуоҕа. Манна Уһук Илин эрэгийиэннэрин култууратын, төрүт үгэстэрин уонна устуоруйатын киэҥник сырдатыахтара.

Бэстибээлгэ Уһук Илин төрүт олохтоох норуоттарын култууратыгар ураты болҕомто ууруллуоҕа. Саамай сүрүн тэрээһининэн «Алеуттартан саҕалаан сахаларга тиийэ. Уһук Илиннээҕи хайысха» (От алеутов до якутов. Дальневосточный вектор) диэн бырайыак буолуоҕа. Бу бырайыак пуорум кыттыылаахтарын уонна ыалдьыттарын эрэгийиэн норуоттарын үгэстэрин, олохторун-дьаһахтарын уонна уус-уран баайдарын кытта билиһиннэриэҕэ.

Арассыыйа Бырабыыталыстыбатын бэрэссэдээтэлин солбуйааччы – Уһук Илиннээҕи федеральнай уокурукка Бэрэсидьиэн боломуочунай бэрэстэбиитэлэ Юрий Трутнев бэлиэтииринэн, пуорум экэниэмикэни эрэ буолбакка, эрэгийиэннэр уратыларын — култуураларын, айар ситиһиилэрин көрдөрөр соруктаах. «Пуорум кыттыылаахтара уонна ыалдьыттара манна биир сиргэ мустан, айар бөлөхтөрү кытта билсиэхтэрин, эрэгийиэннэр ураты бырайыактарын көрүөхтэрин сөп. Бу барыта биһиги Уһук Илиммитин өссө чугаһатар, дьону манна кэлэн бу кэрэни бэйэлэрин харахтарынан көрөллөрүгэр көҕүлүүр», – диэтэ кини.

Пуорум күннэригэр Владивосток куорат киин болуоссатыгар күн аайы Уһук Илинтэн кэлбит айар бөлөхтөр кэнсиэртэрэ буолуохтара. Оттон балаҕан ыйын 5 күнүгэр куорат олохтоохторугар уонна ыалдьыттарыгар анаан «Чуумпу акыйаан матыыптара» диэн улахан гала-кэнсиэр ыытыллыаҕа.

Тэрээһин улахан чааһа Арассыыйа уонна Уһук Илин устуоруйатыгар ананыаҕа. Дойду бастыҥ түмэллэрэ  илиҥҥи сирдэри баһылааһын, Арассыыйа флотун сайдыытын туһунан кэпсиэхтэрэ. Ускуустубаны сэргээччилэргэ Эрмитажтан ювелирнай оҥоһуктар быыстапкалара, нуучча импрессионизмын уонна аныгы худуоһунньуктар үлэлэрэ дьон болҕомтотугар тахсыахтара. Куорат ыалдьыттарыгар анаан устуоруйалаах сирдэринэн, чуолаан номох буолбут «Миллионка» кыбаарталынан уонна Владивостоктааҕы кириэппэһинэн сэргэх экскурсиялар тэриллиэхтэрэ.