Успуорт оскуолатын дириэктэрэ бириэмийэ сурунан тутуллубут, ол эрээри…

Мэҥэ Хаҥалас улууһун суута успуорт оскуолатын дириэктэрин сокуону кэһэн, көҥүлүнэн дьаһаммытыгар буруйдааҕынан билиннэ. Кини тустаах бэрээдэги тутуспакка, бэйэтигэр уонна солбуйааччытыгар бириэмийэ суруммут. Суут уурааҕынан кини холуобунай эппиэтинэскэ тардыллар болдьоҕо ааспытынан накаастабылтан босхоломмут эрээри, улууска оҥорбут хоромньутун барытын төлүүрүгэр уураахтанна.

Суут быһаарбытынан, 2022 сыл ахсынньы 21 күнүгэр дириэктэр бэйэтигэр уонна кини солбуйааччытыгар бириэмийэ үрдүкү тэрилтэ бирикээһинэн эрэ бэриллиэхтээҕин билэ-билэ, сокуону кэһэн, бириэмийэ аныыр туһунан бирикээс бырайыагын бэлэмнииргэ дьаһайбыт. Ол кэннэ бирикээскэ бэйэтэ илии баттаан, харчыны төлөппүт.

Бу дьайыы түмүгэр «Мэҥэ Хаҥалас улууһа» муниципальнай оройуоҥҥа 243 017 солкуобай 74 кэп. матырыйаалынай хоромньу тахсыбыт. Суут мунньаҕар буруйданааччы бэйэтин буруйун билиммэтэх.

Суут буруйданааччы оҥорбут дьайыытын, уопсастыбаҕа кутталлааҕын, кини тус хаачыстыбатын уонна буруйу чэпчэтэр туругу учуоттаан, судаарыстыбаҕа  50 000 солкуобай ыстараабы төлүүргэ уураахтаата. Ол эрээри, холуобунай эппиэтинэскэ тардыллар болдьоҕо ааспытынан, холуобунай  дьылаттан босхолообут.

Маны таһынан, суут гражданскай ирдэбили толорон, оҥоһуллубут хоромньуну — 243 017 солкуобай 74 кэп. Мэҥэ Хаҥалас улууһун дьаһалтатыгар төлөтөргө быһаарбыт. Суут уурааҕа сокуоннай күүһүгэр киирэ илик диэн, СӨ Сууттарын холбоһуктаах пресс-сулууспата иһитиннэрэр.