Устуоруйаҕа киирбит «Туймаада ыһыаҕын» кытта ураты, үөрүүлээх түгэн

Саха сиригэр демография боппуруоһа уонна дьиэ кэргэни өйөөһүн хаһан да суолтатын сүтэрбэт сүрүн хайысханан буолар. Бүгүн биһиги өрөспүүбүлүкэбит устуоруйатыгар көмүс буукубаларынан суруллубут, бүтүн норуоту сомоҕолообут биир саамай үөрүүлээх уонна долгутуулаах түгэни санатабыт.

Ол курдук, үс сыл анараа өттүгэр — 2023 сылга Туймаада ыһыаҕар түһүлгэҕэ мустубут үгүс тыһыынчаллаах ыалдьыттарга Ил Дархан Айсен Николаев өрөспүүбүлүкэ нэһилиэнньэтэ 1 мөлүйүөн киһи буолбутун туһунан үөрүүлээх сонуну уруйдаан-айхаллаан иһитиннэрбитэ. Бу ураты сонун Саха сирин устуоруйатыгар саҥа кэрдиис кэми арыйбыта.

Дьоллоох мөлүйүөн ахсааннаах кыыс оҕо Мииринэй оройуонугар олорор Гаврил уонна Арина Онуфриевтар дьиэ кэргэттэригэр төрөөбүтэ. Кэлин, от ыйыгар, мөлүйүөн сыыппараны толорон күн сирин көрбүт Саина Онуфриеваҕа өрөспүүбүлүкэ бары дьиэ кэргэттэриттэн анал өйдөбүнньүк мэтээл туттарыллыбыта. Тэрээһин кэмигэр итии-истиҥ эҕэрдэлэр этиллэн, ураты суолталаах мэтээл Онуфриевтар дьиэ кэргэҥҥэ мустубут дьон дохсун ытыһын тыаһыгар доҕуһуолланан үөрүүлээхтик бэриллибитэ. Оччолорго Саха сирин Ил Дархана Айсен Николаев бэйэтин социальнай ситимигэр маннык суруйбута:

«Бэс ыйын 23 күнүгэр өрөспүүбүлүкэтээҕи 1 нүөмэрдээх балыыһаҕа 4100 гр. ыйааһыннаах , 56 см уһуннаах кыыс оҕо төрөөтө. Кини Мииринэйгэ Гаврил уонна Арина Ануфриевтар дьиэ кэргэннэригэр иккис оҕонон күн сирин көрдө. Бу эдэр ыалга эрэ буолбакка, бүтүн Саха сиригэр эмиэ улахан суолталаах түгэн буолар. Ис дууһабыттан эҕэрдэлиибин! Оҕо доруобай уонна дьоллоох буолун!».

Бүгүн Саина кырачаан кыыс улаатан, дьиэ кэргэнин эрэ буолбакка, бүтүн Саха сирин үөрдэ сылдьар. Өрөспүүбүлүкэбитигэр оҕо төрөөһүнүн уонна элбэх оҕолоох дьиэ кэргэттэри өйөөһүн күүһүрэн иһэрэ — кэскили түстүүр сүрүн хардыыбытынан буолар.