Усуйаанаҕа тыа хаһаайыстыбатын салайааччыта «итэҕэли сүтэрбитинэн» үлэтиттэн уһулунна

Усуйаана улууһун борокуратуурата хоруупсуйаны утары охсуһуу сокуонун тутуһууну бэрэбиэркэлээтэ. Түмүгэр, олохтоох муниципальнай тэрилтэ салайааччыта тус интэриэһинэн сокуону кэспитэ биллэн, дуоһунаһыттан босхолонно.

Бэрэбиэркэ көрдөрбүтүнэн, «Усуйаанатааҕы тыа хаһаайыстыбатын управлениета» тэрилтэ салайааччыта биир тыа хаһаайыстыбатын табаар оҥорон таһаарааччытыгар судаарыстыбаттан субсидия көрүллэригэр бу тэрилтэҕэ бэйэтэ 2021-2024 сылларга дуогабарынан өҥө оҥорон, уопсайа 861 тыһыынча солкуобай хамнаһы кистээн ылбыта арыллыбыт.

Маны таһынан, салайааччы улуус дьаһалтатыгар бэйэтин дохуотун туһунан отчуоттуур декларациятыгар сымыйа сыыппаралары ыйбыт. Ол курдук, 2022 сыллааҕы киирбит дохуотун сыыһа көрдөрбүт, оттон 2023-2024 сылларга үөһэ этиллибит тэрилтэттэн ылбыт хамнаһын отой даҕаны суруйбатах.

Бу чахчыларга олоҕуран, улуус борокуратуурата Усуйаана улууһун баһылыгар ирдэбил киллэрбит. Бэрэбиэркэ түмүгүнэн, сокуону кэспит салайааччы «итэҕэли сүтэрбитинэн» дуоһунаһыттан уһулунна диэн Саха Өрөспүүбүлүкэтин борокуратууратын пресс-сулууспата иһитиннэрэр.