Уус Алдан улууһугар кэлэр кыстыкка бэлэмнэнии былаана 100% туолла

Ол курдук кэлэр оттук сезонугар 72 000 туонна чох тиэллэр былаан ылыныллыбыта. Бу чох таһыытын былаанын биир ый иһинэн толорон, муус устар 18 күнүгэр Суотту нэһилиэгэр сезон сабыллыытын үөрүүлээх тэрээһинэ ыытылынна.

Тэрээһиҥҥэ улуус баһылыга Василий Алексеев, улуус баһылыгын бастакы солбуйааччы Семен Бурнашев, ОДьКХ Уус Алданнааҕы филиалын кылаабынай инженерэ Василий Рожин кыттыыны ыллылар. Түүнү-күнүһү аахсыбакка күүскэ үлэлээбиттэрин түмүгэр өрөспүүбүлүкэҕэ чоҕу таһыыга былааны бастакынан толорбуттарыгар махтанан туран, таһаарыылаахтык үлэлээбит улахан уйуктаах массыыналар суоппардарыгар Семен Кривошапкиҥҥа, Семен Тарскайга, Сергей Алексеевка, Николай Олесовка, Василий Киренскэйгэ, Еремей Бубякиҥҥа, Владимир Степановка, Сергей Крыловка, Владимир Гоголевка, чох таһыытын үлэтин салайбыт урбаанньыт Ольга Семеноваҕа СӨ Гражданскай оборона дьыалаларыгар уонна нэһилиэнньэ олоҕо куттала суох буолуутун хааччыйар,  СӨ ОДьКХ уонна энэргиэтикэ министиэристибэлэриттэн, улуус дьаһалтатыттан, ОДьКХ Уус Алданнааҕы филиалын аатыттан махтал суруктары үөрүүлээх быһыыга-майгыга туттардылар.

Инникитин даҕаны бу курдук тэрээһиннээхтик үлэлээн-хамсаан, улуус сайдыытыгар кылааккытын киллэрсэ тураргытыгар эрэнэбит диэн эттилэр. Бу туһунан улуус дьаһалтатын пресс-сулууспата суруйар.