Уус Алдан улууһун үөрэҕин үлэһиттэригэр “Тыа сирин оскуолата: аныгы кэм көрүүлэрэ” диэн сүбэ мунньах буолла

Тэрээһиҥҥэ педагогика билимин дуоктара, бэрэпиэссэр, академик, СӨ Билимин академиятын төрөөбүт тылы чинчийэр, харыстыыр уонна сайыннарар киин салайааччыта Феодосия Габышева, педагогика билимин кандидата, тустаах киин билимҥэ сүрүн үлэһитэ Надежда Васильева кытыннылар.

Күн бастакы аҥаарыгар кэлбит ыалдьыттар улуус баһылыгын Василий Алексеевы кытта көрсөн, улууска үөрэх салаатын сайдыытын тула кэпсэттилэр.

Салгыы “Өркөн” оҕону эбии үөрэхтээһин киинигэр, Мүрүтээҕи эдэр натуралистар ыстаансыйаларыгар, Мүрүтээҕи уолаттар гимназияларыгар, “Мүрүчээнэ” оҕо уһуйааныгар, Мүрү 2-с нүөмэрдээх орто оскуолатыгар сылдьан үлэни-хамнаһы билистилэр уонна оскуолалар, эбии үөрэхтээһин кииннэрэ сөптөөх усулуобуйаҕа оҕолору иитэн-үөрэтэн олороллорун көрөн үөрдүлэр, бэркэ тэринэн олороллорун хайҕаатылар.

Эбиэттэн киэһэ тэрээһин сүрүн чааһа Мүрү 2-с нүөмэрдээх орто оскуолатын саалатыгар ыытылынна. Тыа сиригэр үөрэх тэрилтэлэрин сайдыытыгар аныгы кэм көрүүлэрин ырыттылар. Манна педагогика билимин кандидата, СӨ Билимин академиятын төрөөбүт тылы чинчийэр, харыстыыр уонна сайыннарар киин сүрүн научнай үлэһитэ Надежда Васильева оҕону сахалыы тылынан иитии-үөрэтии сүрүн суолтатын, хайысхаларын туһунан сиһилии кэпсээтэ. Салгыы улуус үөрэҕин уонна оҕо уһуйааннарын тэрилтэлэрэ бастыҥ уопуттарын билиһиннэрдилэр. Ол курдук «Үнүгэс» уһуйаан бырагырааматын нөҥүө оҕону патриотическай өйгө-санааҕа иитии» Уһун Күөллээҕи «Чуораанчык» оҕо уһуйаанын сэбиэдиссэйэ Сахаяна Иванова, «Тулалыыр эйгэ нөҥүө төрөөбүт дойдуга тапталы иитии» Тулунатааҕы «Татыйык» оҕо уһуйаанын бас иитээччитэ Татьяна Васильева, иитээччилэр Варвара Васильева, Тамара Готовцева, “О работе по созданию развивающей среды в Легойском лицее-интернате” Лөгөйдөөҕү лиссиэй-интэринээт дириэктэрэ Михаил Пухов, “И.С.Портнягин аатынан Сыырдаах орто оскуолатын салгыы сайдыытыгар хардыылар” оскуола диэриэктэрэ Марианна Петрова, “Тыа сирин аҕыйах оҕолоох оскуолатын олоҕо, инники кэскилэ” И.В. Пухов аатынан Окоемовка сүрүн оскуолатын учуутала Никита Ховров, “Билим-чинчийэр үлэҕэ сыһыарыы – оскуола үлэтин биир сүрүн хайысхата” И.Н. Жирков аатынан Дүпсүн орто оскуолатын дириэктэри солбуйааччы Ньургуйаана Сивцева, “Төрөөбүт тылы харыстааһыҥҥа ыытыллар үлэ тирээн турар соруктара”, В.В.Алексеев аатынан Мүрүтээҕи уолаттар гимназияларын саха тылын уонна литэрэтиирэтин учуутала Наталия Бурцева иһитиннэриилэри оҥордулар.

Ити иһитиннэриилэр түмүктэринэн Феодосия Васильевна улууска эбии үөрэхтээһин, оҕону патриотическай тыыҥҥа иитии олус күүстээҕин, үөрэх бары хайысхаларыгар үлэ күүскэ ыытылларын бэлиэтээтэ. Төрөөбүт тыл чааһын тутан салгыы үлэни ыытарга, ол иһигэр тыл кэнсиэпсийэтигэр олоҕуран араас хайысханан оҕону сахалыы тылынан үөрэтэргэ, сайыннарарга сорук туруорда итиэннэ улуус дьаһалтатын кытта биир ситимнээх үлэ барара көстөрүн этэн туран, улуус саҥа салалтатыгар уонна үөрэх тэрилтэлэрин салайааччыларыгар инникитин өссө үрдүк ситиһиилээх, таһаарыылаах үлэни баҕарда.

Уус Алдан улууһун дьаһалтатын пресс-сулууспата.