Уус Алдаҥҥа успуорт сайдыытыгар улахан хардыылар оҥоһуллаллар

Дойду Бэрэсидьиэнэ Владимир Путин Ыйааҕынан олоххо киирэр «Демография» национальнай бырайыак чэрчитинэн, «Спорт – норма жизни» федеральнай бырайыак иһинэн «Бизнес-спорт» («Я выбираю спорт») бырайыагынан Уус Алдан улууһугар икки былаһаакка тутулла турар.

Ол курдук Баатаҕай нэһилиэгэр ГТО, I Хоро нэһилиэгэр «Умная спортивная площадка» диэн ааттанар аныгылыы көрүҥнээх, араас успуорт көрүҥнэригэр аналлаах былаһааккалар тутуллаллар.

Улуус баһылыга Василий Алексеев уонна улуустааҕы тутуу, архитектура управлениетын начаалынньыга Максим Гуляев I Хоро нэһилиэгэр тутулла турар «Умная спортивная площадка» үлэтин хаамыытын билистилэр.

Олохтоохтор субуотунньукка күргүөмүнэн тахсан, былаһаакка тутуллуохтаах сиригэр бетонун кута сылдьаллар. Тутуу балаҕан ыйыгар түмүктэнэрэ былааннанар.

Бу, успуорт саҥа былаһаакката үлэҕэ киирдэҕинэ нэһилиэнньэ баскетболунан, волейболунан, мини-футболунан дьарыктаналларыгар сөптөөх усулуобуйа тэриллиэҕэ итиэннэ эти-хааны чэбдигирдэр тренажердары туруоран олохтоохтор чэбдик, чөл олоҕу тутуһалларыгар, доруобуйаларын бөҕөргөтөллөрүгэр бигэ тирэх буолуоҕа. Бу туһунан Уус Алдан улууһун дьаһалтатын пресс-сулууспата иһитиннэрэр.