ВЭФ-2026: ирбэт тоҥҥо банан уонна папайя үүнэриэххэ сөп дуо?

Папайя уонна банан үүнэллэрин өссө ханна көрүөххэ сөбүй? ВЭФ-2026 «Уһук Илин уулуссатыгар» Саха сирин павильонугар быйыл истиэндэ кэнсиэпсийэтэ «За счастьем в Якутию» диэн ааттаах.

Киириигэ — саҥардыллыбыт толбоннурар өҥнөөх ураһа, саха дьонун үгэс буолбут сайыҥҥы дьиэлэрэ, болҕомтону тута тардар. Иһигэр —  тыыннаах пальма, папайя (8 мас) уонна бананнар! Бу «Саюри» тэпилииссэлэригэр сылы быһа үүннэриллибиттэр. Аан дойдуга соҕотох ирбэт тоҥҥо тиһиктээхтик үлэлиир тэпилииссэ комплекса. Бу декорация буолбатах: «Саюри» туһунан бастакы сөбүлэҥэ экэнэмиичэскэй пуорумҥа лоп курдук 10 сыл анараа өттүгэр, о.э. 2016 сыллаахха илии баттаабыттара. Онтон бүгүн 3,3 га иэннээх комплекс Дьокуускай ырыынагын оҕуруот аһынан 25% диэри хааччыйар.

«Карта будущей Якутии» интерактивнай каартаҕа — Табаҕа тумула, Өлүөнэ муостата, сэлии Аан дойдутааҕы киинэ уонна «Дальний Восток — Земля приключений» куонкурус маршрута бааллар.

Онтон быйыл Саха сиригэр сылы эргиччи үлэлиир былааннаах «Полярная звезда» оҕо киинэ — Арассыыйаҕа кэнники 10 сылга бастакы саҥа оҕо лааҕыра уонна дойдуга оҕо сынньалаҥын эйгэтигэр бастакы концессия аһыллыаҕа. Бырайыак КРДВ кытта сөбүлэһиинэн «Якутия» ТОР резиденын статуһугар киирэр, инвестиция-1,8 млрд солк.кэриҥэ, сылга 5,2 тыһ. диэри оҕону хабыаҕа.

Саха сирэ Илиҥҥэ экэнэмиичэскэй пуорумҥа — ураты, аныгы уонна улахан бырайыактарга аһаҕас.