ВЭФ-2026 кэмигэр Владимир Путин Саха сиригэр маастар-былаанынан тутуллубут мэдиссиинэ тэрилтэлэрин чорботон бэлиэтээтэ

Арассыыйа Бэрэсидьиэнэ Владимир Путин Илиҥҥи экэнэмиичэскэй пуорум  пленарнай мунньаҕар, саамай сүрүн сорук быһыытынан бүтүн дойду үрдүнэн дьон олороругар табыгастаах усулуобуйа тэриллиэхтээҕин, итиннэ дьоҕус куораттар, сэлиэнньэлэр бары киирэллэрин, барыларыгар аныгы инфраструктура оҥоһуллуохтааҕын туһунан эттэ.

Дойду баһылыга Уһук Илин 22 куоратыгар уонна агломерациятыгар маастар-былааннар оҥоһуллубуттарын, өссө 15 итинник докумуон арктическай тирэх пууннарга бэлэмнэммитин эттэ. Бу стратегическай соруктар сири-уоту  сайыннарыыны, үлэ миэстэлэрин тэрийиини уонна социальнай инфраструктураны саҥардыыны быһаараллар. Бэрэсидьиэн тоһоҕолоон Саха сиригэр ыытыллыбыт үлэни бэлиэтээтэ.

«Туспа тутан бэлиэтиэхпин баҕарабын, маастар-былааннар чэрчилэринэн Дьокуускайга искэни эмтиир аныгы киин, оттон Улан-Удэҕэ – ядернай мэдиссиинэ инники күөҥҥэ сылдьар киинэ аһыллыбыттарын. Билигин бу куораттар уонна эрэгийиэннэр олохтоохторо дьиэлэригэр олорон хаачыстыбалаах анал көмөнү ылар эбэтэр чинчийиини оҥорторор кыахтаннылар. Бу иннинэ итинник кыах суоҕунан, Москва, Петербург эбэтэр Новосибирскай курдук атын мегаполистарга айанныырга күһэллэллэрэ», – диэтэ дойду баһылыга.

Дьокуускайдааҕы искэн киинин таһынан, Путин Нерюнгритааҕы  поликлиниканы холобурга аҕалла. Эбийиэк олус мөлтөх туруктааҕҕа, өрөмүөн манна 2024 сыллаахтан саҕаламмыт. Икки сыл иһигэр инженернэй систиэмэлэрин, эмтиир кэбиниэттэри саҥардыбыттар.

Путин этэринэн, уһук илиҥҥи уонна арктическай маастар-былааннар 400-тэн тахса эбийиэктэрэ бырайыактанар уонна тутуллар стадияҕа сылдьаллар, 300-чэкэ эбийиэк үлэҕэ киирбит. Олор истэригэр – саҥа оскуолалар, балыыһалар, поликлиникалар, аэропортар уонна уопсастыбаннай эйгэ сирдэрэ бааллар.