ВЭФ-2026: «ВОИН» киин ураты былаһаакканы билиһиннэрдэ

Илиҥҥи экэнэмиичэскэй пуорум иитинэн «Уһук Илин уулуссата» быыстапкаҕа 600 квадратнай миэтэрэ иэннээх “ВОИН” Киин улахан павильона аһылынна.

Ордук ураты болҕомто ытыыны бэрэбиэркэлээһиҥҥэ уурулунна. Бойобуой снайпинг федерациятын уонна “Калашников” концерны кытта бииргэ  анал сир тэрилиннэ. Онно ыалдьыттар АК-12 уонна АК-74М апатамааттары ыһарга-хомуйарга үөрэнэллэр, ону тэҥэ электроннай тренажердаах ырааҕы  уонна поппер сыаллары төһө түргэнник таба ыталларын бэрэбиэркэлииллэр.

Павильоҥҥа РФ бырабыыталыстыбатын бэрэссэдээтэлин солбуйааччы, Уһук Илиҥҥи федеральнай уокурукка бэрэсидьиэн боломуочуйалаах бэрэстэбиитэлэ, Киин кэтээн көрөр сэбиэтин бэрэссэдээтэлэ Юрий Трутнев сырытта.

-«ВОИН” киин үлэтэ дойдубут инникитин туһугар суолтата улахан. Киин Ийэ дойдуларын таптыыр, сатаан көмүскүүр кыахтаах эдэр уолаттары уонна кыргыттары иитэргэ көмөлөһөр. Мин тус бэйэм Киин үлэтигэр улахан суолтаны биэрэбин. Сотору Уһук Илиҥҥэ өссө хас да филиал аһыллыаҕа. Бу Уһук Илин эрэгийиэннэрин тыһыынчанан эдэр дьонугар күннээҕи туһалаах, идэтийбит билиини ылалларыгар саҥа кыахтары биэрэр, ордук Аҕа дойдуга  сулууспалыыры талар дьоҥҥо, — диэн тоһоҕолоон эттэ Юрий Трутнев.

«ВОИН” Кииҥҥэ настаабынньыктааһын диэн, бастатан туран, уопуту биэрии уонна олох бириинсиптэрин тиэрдии буолар. Бүгүн былаһааккаҕа 16 эрэгийиэнтэн 35 инструктор үлэлиир. Биһиги курсааннарбыт бырагыраамалары эрэ баһылыыр буолбатахтар, олоххо наадалаах билиини ылаллар. Үгүстэрэ ыксаллаах быһыыга-майгыга сылдьыбыттара, дьону быыһаабыттара. Бу манан биһиги Кииҥҥэ дьиҥнээх патриоттары иитэрбитин көрдөрөбүт», — диэн бэлиэтээтэ “ВОИН”  Киин дириэктэрэ Дмитрий Шевченко.

Түөрт сыл иһигэр Киин 165 курсааны бэлэмнээбит.