ВИДЕО: суола суох тайҕанан уонна бадараанынан

Кыра нэһилиэнньэлээх пууннарга уонна ыраах сирдэргэ куоластааһыны ыытыы мэлдьи экстремальнай усулуобуйалары кытта ситимнээх.

Өлүөхүмэ улууһугар Кээчи 458 №-дээх быыбардыыр учаастак хамыыһыйатын чилиэннэрэ (бэрэссэдээтэл Валентина Павлова) Айаан, Кээтэт, Тэгээн, Бэттимэ, Икки Тиит, Хойҕуолаах, Олом диэн ыраах, суола-ииһэ суох учаастактарга быыбардааччыларга тиийээрилэр, 175 килэмиэтири тайҕанан уонна бадараанынан айаннаатылар. Бу учаастактарга тыраахтарынан 4 күн устата айаннаатылар.

Бу учаастактарга сылгыһыттар, метеорологтар, энергетиктэр ололроллор, кинилэри куоластатаары айаннаатылар. Быыбар хамыыһыйатын чилиэннэрэ айан устатын тухары быыбар докумуоннарын харахтарын харатын курдук харыстаан илтилэр. Балаҕан ыйын 20-гэр эрэ аһыллыахтаах куоластаммыт илиистээх дьааһыктары кутталлаах сирдэринэн илиилэригэр тутан олордулар.

Айан ыарахаттарын аахсыбакка учаастактааҕы быыбар хамыыһыйатын бэрэссэдээтэлин солбуйааччы Николай Третьяков, учаастактааҕы быыбар хамыыһыйатын чилиэнэ Ганс Маркин уонна кинилэри арыаллыыр полиция үлэһитэ Матвей Сокорутов сорудаҕы чиэстээхтик толордулар. Быыбары тэрийээччилэр суолга мэһэйдэри сатабыллаахтык туораппыт тырахтарыыска  Айаал Корниловка махтаналлар.