ВИДЕО: Таатта уола бэлисипиэтинэн Сунтаарга сэттэ күнүнэн тиийдэ

Вова Никитин бу иннинэ куораттан дойдутугар Тааттаҕа бэлисипиэтинэн тиийэн соһуппуттаах.

Аны Сунтаарга диэн санааны ылынан, аҕыйах хонуктааҕыта айаҥҥа турунан, сэттэ күнүнэн биһиги дойдуну булла. Дьиҥэр бэҕэһээ кэлиэхтээҕин ардах күүскэ түһэн Кутанаҕа хоммут, хата онно кинини көрсөн, сынньатан саппыкы кытта бэлэхтээбиттэр. Уол сыалбын ситтим, аны улахан айаҥҥа санамматым буолуо диир да, сылайбыт түгэнигэр этэр этиитэ буолуон эмиэ сөп.

Тимир көлөтүн 10 000 солк. «Юла» сыһыарыыттан ылынан бэркэ кэллэ диэн хайгыыр. Айаннаан истэхпинэ таксистар тохтоон арааһынан көмө буолан абыраатылар, хас биирдии сиргэ үөрэ-көтө көрүстүлэр, хаартыскаҕа түһэллэр диэн санаатын үллэстэр. «Маннык уһун айаҥҥа бэрчээккэҕитин умнумаҥ.  Аһынан хааччыллыы үчүгэй буолуохтаах уонна туустаах уу, минньигэс ас булгу баара ирдэнэр»,- диир.

«Аккаастана сыспыт түгэннээҕиҥ дуо?” — диирбин,  симиктик: «Баар этэ… Ол эрээри кэллим, Сунтаары буллум», — диир. Онон эр киһи санаммыт баҕатын, тылын толоруута буоллаҕа…

Билигин уол Сунтаары кэрийэ барда, хата көрдөххүтүнэ эҕэрдэлэһэн, уруйдуу-айхаллыы көрсөөрүҥ..

Тускулаана Горохова-Кобельянова