Владимир Путин Уһук Илин креативнай индустрияларын өйүүр саҥа дьаһаллары бэлиэтээтэ

РФ Бэрэсидьиэнэ Владимир Путин XI Илиҥҥи экэнэмиичэскэй пуорум пленарнай мунньаҕар Саха сирэ креативнай экэниэмикэни сайыннарыыга уопутун бэлиэтээтэ.

Уһук Илиннээҕи урбааҥҥа инфраструктураны тэрийии туһунан этэн туран, судаарыстыба баһылыга Дьокуускайга үлэлиир «Үлэ кыбартаалын» креативнай кластерын холобурдаата.

— Дьокуускайга «Үлэ кыбартаала» креативнай кластер үлэлиир, — диэтэ Владимир Путин. Бэрэсидьиэн маннык былаһааккалар дьоҕус, ол гынан баран кэскиллээх биисинэс тардыһар сирдэринэн буолалларын уонна экэниэмикэ  саҥа хайысхаларын сайыннарыыга көмөлөһөллөрүн бэлиэтээтэ.

Судаарыстыба баһылыга Уһук Илиҥҥэ уонна Арктикаҕа креативнай индустриялары өйүүр бүтүн экосистиэмэни тэрийэр наадатыгар ураты болҕомтотун уурда. Онно үлэлиир сирдэр, үп-харчы инструменнара, тас дойдулар партнердарын кытта бииргэ үлэлиир кыахтар уонна култууралар икки ардыларынааҕы кэпсэтии былаһааккалара баар буолуохтаахтар, киллэриллиэхтээхтэр. Ити урбаанньыттарга бырайыактары далааһынныырга, тарҕатарга уонна бородууксуйаларын саҥа ырыынактарга таһаарарга кыаҕы биэриэҕэ.

Креативнай экэниэмикэ кэскиллээх хайысхаларын ахсааныгар Владимир Путин мультипликацияны, кинематографияны, ювелирнай дьыаланы уонна үгэс буолбут араас оҥоһуктары оҥоруунан дьарыктанааччылары ааттаата. Уһук Илин эрэгийиэннэрин култууралара, үгэстэрэ Арассыыйаҕа эрэ буолбакка, тас дойдуларга эмиэ ирдэниэн сөптөөх ураты бородууксуйаны оҥорорго кыаҕы биэрэллэр.

—РФ Бэрэсидьиэнэ Владимир Владимирович Путин Уһук Илини сайыннарыы биһиги дойдубут инники күөҥҥэ тутар тутаах соруга буоларын өссө төгүл бигэргэттэ. Бу судаарыстыба баһылыгын быһаарыытынан, Уһук Илин социальнай-экэнэмиичэскэй сайдыыга урутаан инники күөҥҥэ иһэр тэтимин көрдөрөр, — диэн РФ Бырабыыталыстыбатын Бэрэссэдээтэлин солбуйааччы — РФ Бэрэсидьиэнин Уһук Илиннээҕи федеральнай уокурукка боломуочуйалаах бэрэстэбиитэлэ, ВЭФ бэлэмнэниигэ уонна ыытыыга тэрийэр кэмитиэт бэрэссэдээтэлэ Юрий Трутнев.

Саха сирэ креативнай индустриялары туруктаахтык сайыннарар. «Үлэ кыбартаала» бу үлэ биир тутаах былаһаакката буолла. Бүгүн кластер киинэ оҥоруутугар, анимацияҕа, видео оонньуулары оҥорууга, медиа уонна цифровой контеҥҥа, муода уонна дизайн эйгэтигэр үлэлиир 230 резидены түмэр. Сэттэ хампаанньа урутаан сайдар сир резиденнэрэ буолаллар.

«Үлэ кыбартаала» арыллыаҕыттан Дьокуускайдааҕы биллэр-көстөр уопсастыбаннай уонна дьыалабыай эйгэнэн буолбут. Бу былаһааккаларга 360-тан тахса тэрээһин, ол иһигэр улахан пуорумнар, бэстибээллэр уонна муода көрдөрүүлэрэ ыытыллыбыттар.  Манна сылдьааччылар, түмсээччилэр уопсай ахсааннара 500 тыһыынчаны куоһарбыт.

Креативнай кластер үлэтин Владимир Путин Дьокуускайга 2024 сыл бэс ыйыгар кэлэ сылдьан билсибитэ. Бэрэсидьиэҥҥэ онно инновация уонна креативнай экэниэмикэ эйгэтигэр өрөспүүбүлүкэ бырайыактарын уонна ситиһиилэрин, ону тэҥэ салааны салгыы сайыннарыы кэскилин билиһиннэрбиттэрэ.

Креативнай секторы сайыннарыы өрөспүүбүлүкэ стратегическай хайысхаларыттан биирдэстэринэн буолар. СӨ Ил Дархана Айсен Николаев көҕүлээһининэн айар үлэҕэ урбаан сайдарыгар усулуобуйаны тэрийиигэ, олохтоох бренды өйөөһүҥҥэ, киинэ, анимация, IT, дизайн уонна да атын аныгы индустриялары сайыннарыыга үлэ ыытыллар.

Ыччакка кыаҕар туспа болҕомто ууруллар. Креативнай индустриялар аныгы үлэ миэстэтин тэрийэргэ, бэйэ бырайыактарын үлэҕэ киллэрэргэ уонна урбаан көҕүлээһиннэрин быһаччы өрөспүүбүлбүкэҕэ олоххо киллэрэргэ тирэх буолаллар, кыаҕы биэрэллэр. Инфраструктураны уонна федеральнай өйөбүл мэхэньиисимнэрин салгыы сайыннарыы экэниэмикэ бу секторыгар саҥалыы уратытык турууну, көҕүлээһини биэриэхтээх. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.

Сиһилии: https://www.sakha.gov.ru/news/62637