«ВОИН» киин 4 тыһыынчаттан тахса курсааны бэлэмнээтэ

«ВОИН» киин Саха сиринээҕи филиала икки сыллаах үлэтин устата 4 тыһыынчаттан тахса курсааны бэлэмнээтэ. Бу кэм устата филиал өрөспүүбүлүкэҕэ ыччаты байыаннай-патриотическай иитиигэ биир сүрүн былаһаакканан, ону тэҥэ Ийэ дойду көмүскэлигэр уонна куттал суох буолуутугар туһуламмыт педагогтары бэлэмниир киин буолбута. Манна өрөспүүбүлүкэ үөрэх тэрилтэлэрин 586 педагога үөрэҕи ааспыта.

Филиал икки сыллаах үбүлүөйүн бэлиэтээбит «ВОИН» киин уон салаатын иһигэр киирэр. Билигин киин ДНӨ, ЛНӨ, Чувашия, Саха сирэ, Камчатскай кыраай, Волгоград, Запорожье, Херсон, Мурманскай уонна Сахалин уобаластарыгар үлэлиир. Бу кэм устата дойду бары филиалларыгар 40 тыһыынчаттан тахса курсаан бэлэмнэммитэ.

Үөрэх хаамыытыгар 400-чэ инструктор кыттыһар, олор ортолоругар бойобуой дьайыылар кыттыылаахтара, анал байыаннай эпэрээссийэлэр бэтэрээннэрэ уонна Арассыыйатааҕы Бойобуой снайпинг федерациятын исписэлиистэрэ бааллар. Настаабынньыктар практическай уопуттарын көмөтүнэн, курсааннар теория өттүнэн билиини эрэ буолбакка, араас балаһыанньаҕа сөпкө дьаһанарга наадалаах сатабыллары эмиэ ылаллар.

«ВОИН» киин хамандыыра Андраник Гаспарян бэлиэтээбитин курдук, настаабынньыктар эдэр ыччакка Ийэ дойдуга сулууспалааһын, устуоруйа өйдөбүлүгэр ытыктабыл, дойду инникитин туһугар эппиэтинэстээх буолуу сыаннастарын тиэрдэллэр.

Саха сиринээҕи филиал курсааннара федеральнай күрэхтэһиилэргэ көхтөөхтүк кытталлар.  Өрөспүүбүлүкэ хамаандата 2025 сыллаахха Бүтүн Арассыыйатааҕы «Путь ВОИНа» байыаннай-тактическай күрэхтэһиигэ I миэстэ буолбута. Ону тэҥэ, өрөспүүбүлүкэҕэ «Время юных героев» профильнай симиэнэлэр ыытыллаллар, ол чэрчитинэн, оскуола оҕолоро байыаннай-патриотическай, спортивнай уонна үөрэтэр бырагыраамаларга кытталлар.

«ВОИН» киин дириэктэрэ Дмитрий Шевченко этэринэн, үгүс выпускниктар үөрэхтэрин бүтэрэн баран, олохторун сэбилэниилээх күүстэри уонна судаарыстыбаннай сулууспаны кытта ситимнииргэ быһаарыналлар.

«ВОИН» киин үлэтэ эдэр ыччат ортотугар практическай сатабыллары, гражданскай эппиэтинэһи уонна патриотическай сыаннастары үөскэтиигэ, ону тэҥэ дойду инники көмүскээччилэрин бэлэмнээһиҥҥэ туһуланар.

Сиһилии аах: https://www.sakha.gov.ru/news/47626