Волонтердар 86 тыһ. кв.м. тахса хаххалыыр сиэккэлэри баайбыттар

РФ Сэбилэниилээх Күүстэригэр анаан Саха сирин волонтердара 86 тыһ. кв.м. тахса хаххалыыр сиэккэлэри баайбыттар, 150 тыһ. тахса араас оҥоһугу оҥорбуттар.

Ол туһунан СӨ Ыччат дьыалаларыгар уонна социальнай коммуникацияларга миниистири солбуйааччы Александр Максимов иһитиннэрдэ. Кини этэринэн “Добро.рф” платформаҕа өрөспүүбүлүкэттэн 3569 үтүө дьыаланы оҥорбут 46202 доброволец бэлиэтэммит.

“Байыаннай дьайыы саҕаланыаҕыттан #МЫВМЕСТЕ  Арассыыйатааҕы хардарыта көмөлөһүү аахсыйатын эрэгийиэннээҕи ыстааба үлэлиир. Аахсыйа улуустааҕы ыстааптара 36 улууска, куорат уокуруктарыгар аһыллыбыттара. Манна 6,5 тыһ. волонтер кыттыыны ылар. Кинилэр байыаннай дьайыы кыттыылаахтарын, кинилэр дьиэ кэргэттэрин дьиэҕэ-уокка көрсөр кыһалҕаларын быһаарарга, арыаллаан сылдьыыга, аһы-үөлү, эми, наадалаах малы-салы ылыыга 6 тыһ. аадырыстаах сайаапка киирбитин толордулар”, — диэн бэлиэтээтэ Александр Максимов.

Кини этэринэн, эрэгийиэҥҥэ гуманитарнай көмөнү тутар пууннар бааллар, «Илии сылааһа» иистэнэр сыах, «Боевые шелкопряды Якутии», «Якутия с тобой», «Внуки победителей», «ДоброVольцы», «ШТОРМ», «Волонтеры Саха», «Серебряные волонтеры «Молоды душой», «Волонтеры Туймаады» хамсааһыннар үлэлииллэр.

“Маны таһынан от ыйын 23 күнүгэр Дьааҥы улууһугар ыксаллаах быһыы-майгы үөскээбитинэн сибээстээн, гуманитарнай көмөнү хомуйар суһал ыстаап тэриллибитэ. Күн бүгүн 3 туоннаттан тахса таһаҕас хомулунна, хомуур билигин да салҕанар”, — диэн санаатын үллэһиннэ СӨ Ыччат дьыалаларыгар уонна социальнай коммуникацияларга миниистири солбуйааччы Александр Максимов.

СӨ Ил Дарханын уонна Бырабыыталыстыбатын пресс-сулууспата.