Ыам ыйа — үтүө кэм

Ыам ыйа — саас саамай муҥутуур кэмэ.

Норуот синоптига Тускул «ыам ыйыгар өбүгэ саҕаттан сири-дойдуну аһатан, Үөһээ Айыылартан алгыс түһэрэн көрдөһөллөр. Буолумуна, уорааннаах уһун кыһын кэннэ, сири-дойдуну үллүктүү сыппыт хаар баран, саха бастакы сибэккитэ ньургуһун барахсан тыллан,  үтүө кэм үүнэр…» диэн бэлиэтиир.

Ыам ыйын 6 күнэ — Дьөгүөрэйэп. Бастакы кус кэлэр. От бытыгырыыр, сүөһү уостаан аһыыр.
Ыам ыйын 8 күнэ — Ырыаһыт чыычаах тоҕо анньан көтөн кэлэр кэмэ.
Ыам ыйын 12 күнэ — Хаһыҥ түһүөн сөп.
Ыам ыйын 13 күнэ — Киэһэлик ичигэс, уу чуумпу, онтон сулустаах түүн буоллаҕына, ардаҕа суох сайыны күүт.
Ыам ыйын 14 күнэ — Дьэрэмэйэп күнэ. үчүгэй күн буоллаҕына — күһүнэ өлгөм үүнүүлээх, хаҕыс күн буоллаҕына, кыһына — тымныы.
Ыам ыйын 19 күнэ — Бастакы сиик түһэр. Сиигэ элбэх буоллаҕына, күһүн элбэх оҕурсуну хомуйуоҥ.
Ыам ыйын 22 күнэ — Сааскы Ньукуола. Кэҕэ этэр, сүөһү мэччийэн аһыыр. Сайыҥҥы хонук саҕаланар.

Ыам ыйын 26 күнэ  –  Ыам кумаара туһэр. Хортуоппуйу олордуу.
Ыам ыйын 28 күнэ — сылаас күн буоллаҕына, сайыны быһа сылаас буолар. Ый туолуута. Сайылыкка көһөр ый.