Ыам ыйыгар биэнсийэ үрдүөҕэ

Ыам ыйыгар сорох биэнсийэлээхтэр биэнсийэлэригэр эбии төлөбүрү ылыахтара. Бу туһунан Г.В. Плеханов аатынан РЭУ судаарыстыбаннай уонна муниципальнай үп кафедратын бэрэпиэссэрэ Юлия Финогенова иһитиннэрдэ.

«Сорох дьон биэнсийэлэрэ хат ааҕыллыаҕа. Бастакытынан, авиация көтөр экипажтарын урукку чилиэннэригэр уонна таас чох бырамыысыланнаһын үлэһиттэригэр сыһыаннаах», — диэн Финогенова РИА «Новости» кэпсээтэ. Маннык категориялаах дьоҥҥо биэнсийэлэригэр эбии төлөбүрү сылга түөртэ хат ааҕаллар, быйыл иккис төгүлүн оҥоһуллуоҕа.

Ону тэҥэ, муус устарга 80 саастарын туолбут дьон, бастакы группалаах инбэлиит буолбуттар, Аҕа дойду Улуу сэриитин инбэлииттэрэ уонна кыттыылаахтара, итиэннэ иитиллээччилэрдээх биэнсийэлээхтэр эбии төлөбүрү ылыахтара. Бу дьоҥҥо эбии төлөбүр кээмэйэ хамнастарын таһымыттан уонна  ыстаастарын уһунуттан тутулуктаах.

Арассыыйаҕа, Латвияҕа, Литваҕа уонна Эстонияҕа олорор Аҕа дойду Улуу сэриитин инбэлииттэрэ уонна кыттыылаахтара Кыайыы күнүгэр сыл аайы бэриллэр 10 тыһыынча солкуобай кээмэйдээх төлөбүрү ылыахтара. Муус устарга 80 саастарын туолбут эбэтэр бастакы группалаах инбэлиит буолбут дьоҥҥо страховой биэнсийэ састаабыгар киирэр сүрүн төлөбүр икки төгүл үрдүөҕэ — ыйга 9 584,69 солкуобайтан 19 169,38 солкуобайга диэри (оройуоннааҕы коэффициены аахпакка туран).

Оттон бастакы группалаах инбэлиит 80 сааһын туоллаҕына, сүрүн төлөбүр иккистээн үрдээбэт. Иитиллээччилэрдээх биэнсийэлээхтэр эмиэ эбии төлөбүрдэри ылыахтара.

Урут иһитиннэриллибитинэн, орто дохуоттаах дьон ый аайы 2–3 тыһыынча солкуобайы уурунан уонна уһун болдьохтоох мунньунуу бырагырааматыгар кыттан, биэнсийэлэригэр эбии мөлүйүөн солкуобайы мунньуохтарын сөп.