Ыам ыйыгар күүстээх магнитнай буурҕалар күүтүллүбэттэр

Ыам ыйын бастакы күнүгэр магнитнай буурҕа буолан ааста. Геомагнитнай хамсааһын индексэ 4,5 баалга диэри үрдээбитэ — бу саһархай өҥнөөх таһым, манна күн-дьыл уларыйыытыттан тутулуктаах дьон үксүгэр доруобуйалара мөлтөөбүтэ бэлиэтэнэр.

Ыам ыйыгар магнитнай буурҕалар буолуохтара, ол гынан,  бу  ыйга күүстээх магнитнай буурҕалар күүтүллүбэттэр. Ол эрээри, күн-дьылтан тутулуктаах дьоҥҥо хас даҕаны уустук кэмнэр буолуохтара.

Күн астрономиятын лабораториятын дааннайдарынан, ыам ыйын 4 күнүгэр, 3,5 баал кэриҥэ магнитнай хамсааһын буолара күүтүллэр. Бу толору буурҕа буолбатах, гынан баран, таһыма үрдүк — доруобуйаҕа дьайыан сөп.

• Ыам ыйын 5 уонна 6 күннэрэ — чуумпу, 2 баал кэриҥэ.
• Ыам ыйын 7 күнэ — эмиэ 4 баалга диэри үрдээһин, магнитосфера күүрүүтэ.
• Ыам ыйын 8 уонна 9 күннэрэ — 3 баал, от күөх таһым.
• Ыам ыйын 10 күнүттэн 14 күнүгэр диэри — биир тэҥ чуумпу турук, 2 баал.
• Ыам ыйын 15 уонна 16 күннэрэ — ый саамай уустук кэмэ. 5 баалга диэри магнитнай буурҕа түһэрэ күүтүллэр. Бу кыһыл таһым, маны хроническай ыарыыта суох дьон эмиэ билиэхтэрин сөп.
• Ыам ыйын 17 уонна 18 күннэрэ — буурҕа дьайыыта намтыыр, 4 баал кэриҥэ.
• Ыам ыйын 19 күнүттэн 22 күнүгэр диэри — чуумпу, 3 баал.
• Ыам ыйын 23 күнэ — эмиэ 4 баал, магнитосфера күүрүүтэ.

Халлаан туругуттан тутулуктанар дьон ыам ыйын 4, 7, 15–16, 17–18 уонна 23 күннэригэр болҕомтолорун ууруохтарын наада. Бу күннэргэ төбө ыалдьыыта, хаан баттааһынын оонньооһуна  уонна уопсай турук мөлтөөһүнэ бэлиэтэниэн сөп.

Саамай сүрүнэ, эрдэттэн бэлэмнэниэххэ наада — магнитнай буурҕалар чуолкай билгэлээһиннэрин икки эрэ хонук иннинэ билиэххэ сөп. Итинтэн атына барыта — быһа холоон сыанабыл уонна биир хонук иһигэр соһуччу уларыйыан сөп.