Үөһээ Бүлүү улууһугар дьон буурҕаҕа түбэспит

Кулун тутар 30 күнүн киэһэ Үөһээ Бүлүү улууһун “112” дьуһуурунай төлөпүөнүгэр икки киһи эрийэн көмөҕө наадыйалларын эппиттэр. Сатыы Үөһээ Бүлүүгэ баран иһэн Сыырдаах сиригэр (улуус кииниттэн 11 км) 1954 сыллаахха төрөөбүт эр киһи уонна 1981 сыллаахха төрөөбүт дьахтар буурҕаҕа түбэһэн, салгыы барар кыахтара суох буолбут.

Саха сиринээҕи быыһыыр сулууспа Үөһээ Бүлүүтээҕи көрдүүр-быыһыыр этэрээтин быыһааччыта Александр Семенов тустаах дьон онно олороллорун, кэмиттэн кэмигэр улуус киинигэр диэри сатыы кэлэллэрин эппит.

“Биһиэхэ сайаапка 19:30 мүн. киирбитэ, номнуо аҕыйах мүнүүтэнэн УАЗ массыынанан үһүө буолан ыйбыт миэстэлэригэр туруммуппут, ол эрээри, олус элбэх хаар түһэн айаммыт бытаарбыта. Баазаҕа төннөн кэлэн хаарынан, болуотанан айан тырааныспарыгар (снегоболотоход) көһөн, 22:40 мүн. эмсэҕэлээбит дьоҥҥо тиийбиппит”, – диэн быыһааччы эппит.

Киэһэ 23:24 ч. дьону Үөһээ Бүлүүгэ аҕалбыттар, эр киһи атаҕа утуйан хаалан суһал көмө биригээдэтигэр туттарбыттар, ол эрээри, сотору кэминэн бэйэтин баҕатынан балыыһаттан таһаарбыттар. Бу туһунан Саха сиринээҕи быыһыыр сулууспа иһитиннэрэр.