Үөһээ Бүлүүгэ дьиэ кэргэн күнүн үөрүүлээхтик бэлиэтээтилэр

Аан дойдутааҕы дьиэ кэргэн күнэ Үөһээ Бүлүү улууһугар ураты истиҥ бырааһынньыгынан бэлиэтэннэ.

Бу күн улуус олохтоохторо муниципальнай болуоссакка мустан, үйэлэрин тухары бииргэ олорбут ытык ыаллары чиэстээтилэр, кинилэр үйэлээх тапталларын уонна килбиэннээх олохторун үтүө холобурун ыччакка тириэртилэр.

Тэрээһин саамай долгутуулаах уонна кэрэхсэбиллээх түгэнинэн Ибаррури Марковна уонна Василий Андреевич Васильевтары — алта уон сыл устата олохторун суолун тэҥҥэ, бииргэ тэлэн, бриллиант сыбаайбаларыгар тиийбит ытык ыалы — сылаас ытыс тыаһынан доҕуһуоллаан көрсүү буолла.

Улуустааҕы ЗАГС салаатын салайааччыта Татьяна Кардашевская Васильевтар дьиэ кэргэн Бочуот кинигэтигэр илии баттаатылар.

“Үөһээ Бүлүү улууһа” муниципальнай оройуон баһылыгын социальнай боппуруостарга уонна дьиэ кэргэн бэлиитикэтигэр солбуйааччытыгар Анна Михайловна Уларова  кэрэ-бэлиэ күнүнэн истиҥ эҕэрдэтин тиэрдэн туран, СӨ Ил Дархана Айсен Николаев олохтообут “Дьиэ кэргэн килбиэнэ” кыһыл көмүс өҥнөөх остуолга ууруллар анал бэлиэни Ибаррури, Василий Васильевтарга ытыс тыаһын доҕуһуолугар туттарда.

Васильевтар дьиэ кэргэн 2 оҕолоохтор, 7 сиэннээхтэр, 11 хос сиэннээхтэр. Кинилэр улахан, дьоллоох дьиэ кэргэттэринэн киэн туттабыт! Ону таһынан, ЗАГС салаата олохтообут “Золотые семьи Якутии” диэн дьиэ кэргэттэри уонна кинилэр олохторун сырдатар саҥа кинигэҕэ киирбит ытык ыалларбытын ЗАГС Үөһээ Бүлүүтээҕи салаатын салайааччыта Татьяна Кардашевская эҕэрдэлээтэ.

Үөһээ Бүлүү улууһуттан уопсайа 12 ыал кинигэҕэ киирдэ. Улуус Баһылыга Николаев Валерий Валерьевич аатыттан эҕэрдэ суруктары, сибэкки дьөрбөтүн уонна кыра сэмэй бэлэхтэри үөрэ — көтө туттулар: 1. Геннадий Алексеевич уонна Раиса Семеновна Долгуновтар ыал буолбуттара 60 сылынан; 2. Григорий Степанович уонна Светлана Николаевна Золотаревтар ыал буолбуттара 53 сылынан; 3. Семен Михайлович уонна Евдокия Васильевна Кутугутовтар ыал буолбуттара 52 сылынан.

Ону кытта Үөһээ Бүлүү нэһилиэгин дьаһалтата дьиэ кэргэн сыаннаһын өрө тутан, чөл олоҕу көҕүлээн, «Городки» оонньууга дьиэ кэргэн хамаандаларын икки ардыгар күрэхтэһиини ыытан, олохтоохтор улахан биһирэбиллэрин ылла. Күрэхтэһии «Үс Хоһуун» стадиоҥҥа буолан ааста.

Тэрээһин сүрүн сыалынан-соругунан былыргыттан кэлбит «Городки» оонньууну сөргүтүү уонна киэҥ араҥаҕа тарҕатыы буолар. Ону таһынан, олохтоох дьону-сэргэни физкултуураҕа уонна успуорка көхтөөхтүк дьарыктаныыга сыһыарыы, кинилэр доруобуйаларын бөҕөргөтүү соруга өрүү даҕаны турар. Саамай сүрүнэ – дьиэ кэргэн уопсастыбаҕа суолтатын үрдэтии, биир хамаанда буолан түмсэллэрин, уопсай сыалга дьулуһууларын угуйуу буолар.

Күрэхтэһиини «Үөһээ Бүлүү нэһилиэгэ» тыа сирин дьаһалтата уонна улуустааҕы успуорт управлениета бииргэ тэрийэн ыыттылар. Сүрүн дьүүллүүр сүбэ күрэхтэһии хаамыытын быһаччы салайан, оонньуу кырдьыктаах уонна чиэһинэй буоларын хааччыйда.   Күрэххэ дьиэ кэргэттэр хамаанда туруоран кытыннылар. Хас биирдии хамаандаҕа аҕа, ийэ уонна оҕо (2009 сыллаахха эбэтэр онтон хойут төрөөбүт) киирдилэр. Бу хамаандалар городочнай успуорт былыргылыы быраабылаларынан отой боростуойдук оонньоотулар.

Күрэххэ барыта 5 дьиэ кэргэн кыттан, кворум туолла.   Кыайыылаах хамаанданан фигуралары быраҕан саамай элбэх очкону ылбыт хамаанда буолла. Түмүккэ I миэстэни И.И. Седалищев аатынан дьиэ кэргэҥҥэ көмөнү оҥорор киин хамаандата (122 очколаах), II миэстэни — Ивановтар (91 очколаахтар), III миэстэни  — Титовтар 88 дьиэ кэргэттэрэ ылыахтарын ыллылар.

Бириис пуондата уопсайа 22 000 солкуобай суумалаах «Мааппа» маҕаһыын сэртипикээтинэн туттарылынна. Ол курдук, I миэстэни ылбыт хамаанда – 10 000, II миэстэни ылбыт хамаанда – 7 000, III миэстэни ылбыт хамаанда – 5 000 солкуобайынан, маны сэргэ кыайыылаах дьиэ кэргэттэр мэтээллэринэн уонна кырааматаларынан наҕараадаланнылар.

Күрэхтэһии дьиэ кэргэттэри түмсүүгэ, оонньуу нөҥүө күүһү-уоҕу ыларга, уопсай дьыалаҕа бииргэ кыттыһан сылдьарга улахан көҕүлээһин буолла. Дьиэ кэргэттэр бииргэ сынньанан, үөрэн-көтөн, бэйэ-бэйэлэрин өйөһөн, истиҥ сыһыаннара өссө бөҕөргөөтө. Инникитин умнулла быһыытыйбыт городочнай успуорт өссө сайдан, спартакиадаларга кыттарга улуус күүстээх хамаандатын тэрийиигэ үлэ барыаҕар эрэниллэр.

Салгыы бу күн дьиэ кэргэн сыаннастарын тутуһан олорор ыалларга анал ааттар иҥэрилиннилэр:

1. «Саргылаах саха ыала» анал ааты Үөдүгэй нэһилиэгиттэн элбэх оҕолоох Сардаана уонна аҕалара Константин Захаровтарга, эпиэкэ уонна тулаайах оҕолору көрөр дьиэ кэргэттэр ортолоругар «Иитэр дьиэ кэргэн» анал аат Вера Мироноваҕа уонна Саргылана Николаева дьиэ кэргэттэригэр.

2. Үөһээ Бүлүү сэлиэнньэтин олохтоохторугар, уопсастыба олоҕор көхтөөхтүк кыттан, дойдуну сайыннарыыга төһүү күүс буолар Яковлевтар дьиэ кэргэттэригэр, аҕалара Ариан Степановичка, ийэлэрэ Хотуна Семеновнаҕа, кинилэр оҕолоро Маркелга уонна Сандраҕа «Көхтөөх дьиэ кэргэн» анал аат иҥэрилиннэ.

3. Улууска чэгиэн буолуу доруобуйа төрдө диэн олохторун успуорду кытта ситимниир ыал аҕыйаҕа суохтарын бэлиэтээн, «Спортивнай дьиэ кэргэн» номинация Эмилия, Геннадий Аввакумовтарга туттарылынна.

4. Аныгы кэм түргэн тэтимнээхтик сайдыытын кэрэһэлиир информация үйэтигэр, элбэҕи ааҕар билэр эрэ киһи олоҕу кытта тэҥҥэ хардыылыыр. Ону бэлиэтээн, «Бастыҥ ааҕааччы дьиэ кэргэн» анал номинацияны Сардана, Константин Александровтарга уонна кинилэр оҕолоро Надяҕа, Мишаҕа, Айыынаҕа иҥэрдилэр.

5. Улуустааҕы социальнай көмүскэл салаата «Саргылаах саха ыала» анал ааты Үөдүгэй нэһилиэгиттэн элбэх оҕолоох Сардаана уонна аҕалара Константин Захаровтарга туттарыллынна.

6. Норуот айымньытын киинэ «Талааннаах дьиэ кэргэн» анал ааты норуот тыйаатырын артыыстара, общественнай түмсүүлэр көхтөөх кыттааччылара Тамара, Пантелеймон Егоровтарга уонна үҥкүү бөлөҕүн имигэс үҥкүүһүтэ Владилана, норуот тыйаатырын артыыһа Артем Кёбеллэргэ иҥэрилиннэ.

Улуус баһылыгын социальнай боппуруостарга уонна дьиэ кэргэн бэлииткэтигэр солбуйааччы Анна Уларова тэрээһин кэнниттэн санаатын бу курдук үллэһиннэ:

«Биһиги дьиэ кэргэн сыаннаһа төһө күүстээҕин, төһө суолталааҕын өссө төгүл өйдөөтүбүт. Дьиэ кэргэн – бу хас биирдии киһиэхэ тирэх, өйөбүл, таптал баар сирэ. Биһиги улууспут инники кэскилэ, сайдыыта, туруктаах буолуута дьиэ кэргэн үтүө үгэстэрин хайдах тутуһарбытыттан, харыстыырбытыттан быһаччы тутулуктаах. Бүгүҥҥү курдук үөрүүлээх, түмүктээх тэрээһиннэр дьиэ кэргэн икки ардыгар сыһыаны бөҕөргөтөллөр, ыччакка үтүө холобуру көрдөрөллөр. Эһиги бары кэлэн, биир киһи курдук түмсэн, бу күнү өссө сырдык уонна тэрээһиннээх оҥорбуккутугар махталбын тиэрдэбин. Дьиэ кэргэн барыта чэгиэн туруктаах, дьоллоох буоллун, эйэ уонна таптал өрүү аргыстастын!».

Ону сэргэ, болуоссакка араас оонньуулар, маастар-кылаастар, консультациялар, аспаалга уруһуй ыытыллыннылар. Ыалдьыттар үөрэ — көтө «Дьиэ кэргэн — олох төрдө» диэн оҥоһуллубут маска бэйэлэрин көрүүлэрин, санааларын суруйан ииллилэр. Бу күн үйэлээх таптал, дьиэ кэргэн сыаннаһа мэлдьи үрдүктүк турарын өйдөтөн, уһуннук өйдөнөн хаалыаҕа.

Галина Васильева