Үөһээ Бүлүүгэ оҕо бибилэтиэкэтигэр сахалыы ааҕыы киинин арыйдылар

Муус устар 23 күнүгэр Үөһээ Бүлүүтээҕи оҕо бибилэтиэкэтигэр ураты долгутуулаах өрөгөй чааһа үүннэ. Ол курдук, Саха сирин Ил Дархана Айсен Николаев дьаһалынан, оҕо бибилэтиэкэтин баазатыгар төрөөбүт тылынан ааҕыы киинин аана тэлэччи аһылынна.

Үөрүүлээх түгэҥҥэ бэйэлэрин истиҥ-иһирэх эҕэрдэлэрин улуус баһылыгын экэниэмикэҕэ уонна үпкэ солбуйааччыта Марфа Игнатьева, улуустааҕы үөрэх управлениетын начаалынньыгын солбуйааччы Леонид Огочонов, улуустааҕы «Ийэ тыл» түмсүү дьаһабылын салайааччы Варвара Васильева, улуус оскуолаларын бибилэтиэкэтин түмсүүтүн салайааччы Вера Спиридонова уонна О.Д. Федорова аатынан кииннэммит библиотечнай ситим дириэктэрэ Тамара Саввинова тиэрдэн туран, бу киин инникитин оҕо-аймах уонна дьиэ кэргэттэр сөбүлээн түмсэр, ааҕар, саха тылын тарҕатар ытык сирдэринэн буоларыгар баҕа санааларын бастыҥын тиэртилэр.

Аалай кыһыл лиэнтэни быһыы үөрүүлээх түгэнин кэнниттэн мустубут ытык-мааны ыалдьыттары уонна кырачаан оҕолору арыылаах алаадьынан, кырылыы сылдьар быырпаҕынан күндүлээтилэр.

Салгыы оҕолор саалаҕа чуумпуран, боччумуран олорон «Саха тылын символлара: мин – патриоппун» диэн Х өрөспүүбүлүкэтээҕи олимпиадаҕа кытыннылар. Хас биирдии оҕоҕо «ДТК-центр чтения» СӨ Национальнай бибилэтиэкэтин филиалын сэбиэдиссэйэ И.А. Дранаева илии батааһыннаах сэртипикээттэр ытыс тыаһын доҕуһуолунан туттарыллан, оҕолорбут барахсаттар билиилэригэр билии эбинэн, үөрэн-көтөн, өссө да бу дьол-соргу  олохсуйбут дьиэтигэр кэлэр баҕа санаалаах тарҕастылар.

Вера Спиридонова, И.Н. Барахов аатынан 1 №-дээх бибилэтиэкэ салайааччыта, улуус оскуолаларын бибилэтиэкэлэрин холбоһугун салайааччыта:

— Саха сирин Ил Дархана Айсен Сергеевич Николаев 2025 сыллааҕы дьаһалынан, өрөспүүбүлүкэ бары улуустарыгар оҕо бибилэтиэкэтин  баазатыгар оҕо төрөөбүт тылынан саҥарарын уонна ааҕарын көҕүлүүр сыалтан кииннэри арыйбыттара. Бүгүн биһиги улууспутугар бу үөрүүлээх, ураты суолталаах тэрээһин ыытыллан, олус долгуйан, өрө көтөҕүллэн турабыт. Оҕолорбут да, улахан да дьон бу кииҥҥэ кэлэн, сахалыы ааҕыахтарын сөп. Оскуола бибилэтиэкэрдэрин Ассоциациятын бэрэстэбиитэлэ буоларым быһыытынан, манна И. Н. Барахов аатынан оскуола үөрэнээччилэрин ыытар буолуом. Ааспыт сылтан биһиги оскуолаҕа муниципальнай таһымҥа «Ааҕар дьиэ кэргэн – ааҕар оҕолор» сетевой бырайыак үлэлиир. Бырайыак чэрчитинэн биһиги араас тэрээһиннэри ыытабыт.  Бу база, киин барыбытын түмэр, сахалыы ааҕыыны киэҥник тарҕатар ытык сирбитинэн буоларыгар толору эрэнэбин.

Екатерина Семенова, улуустааҕы оҕо бибилэтиэкэтин сүрүн бибилэтиэкэрэ:

— Биһиги улууспутугар Үөһээ Бүлүүтээҕи оҕо  бибилэтиэкэтигэр сүрдээх үчүгэй, ураты кэрэ-бэлиэ күн буолла. Ол курдук, төрөөбүт тылынан ааҕыы киинэ арылынна. Бу күнтэн ыла киин аана бары оҕолорбутугар, ааҕааччыларбытыгар мэлдьи аһаҕас буолуоҕа. Үөрэнээччилэри, оҕолору күүтэбит, ыҥырабыт! Уопсайынан, сахалыы тылынан ааҕыы билигин сүрдээх сытыытык турар боппуруос. Билигин оҕолор үксүн нууччалыы ааҕаллар. Сахалыы ааҕыы чахчы даҕаны биллэрдик аҕыйаата. Онон бу киин оруобуна бириэмэтигэр, кэмигэр арылынна. Этэргэ дылы, кэмэ-кэрдиитэ чахчы кэлбит эбит. Бу киин арыллан, үлэбитигэр өссө саҥа сүүрээннэри киллэриэ, өссө айымньылаахтык үлэлиэхпит-хамсыахпыт турдаҕа диэн эрэнэбит уонна күндү учууталларбытын, иитээччилэрбитин ыҥырабыт. Биһиги кииммитигэр күндү ыалдьыт, ааҕааччы буолуҥ!

Галина Васильева.